Diadomingo anochi riba mas of menos 11:58, Central di Polis a wordo notifica di un accidente mortal riba L.G. Smith Boulevard, serca di Wind Creek Casino. Un vehiculo tipo SUV, color preto, a dal dos peatón y despues a sigui core for di e lugar di accidente.
Polis y ambulancia a wordo despacha cu maximo urgencia. Na yegada di personal medico, asistencia a wordo duna na tur dos victima, pero lamentablemente nan a fayece na e sitio di e sucedido.
Specialistanan di trafico, un dokter forensico y polis tecnico a presenta pa cuminsa cu e investigacion oficial. Departamento di Slachtofferhulp tambe a brinda asistencia na e famia di e fayecidonan.
Despues di un buskeda, polis a logra localisa e vehiculo involucra na un adres na Bushiri. E chauffeur, un dama, a wordo deteni pa investigacion.
Dokter Voskuil a constata e mortonan di:
- Josely Paulina Vasquez Gonzalez, naci 9 di juli 1960 na Republica Dominicana, y
- Carlos David Vialez Valerio, naci 19 di october 1971 na Republica Dominicana.
Esaki ta marca e prome dos morto den trafico pa aña 2026. Un caso hopi tristo y lamentabel cu a sacudi comunidad.
Cuerpo Policial di Aruba ta enfatisa cu core for di un accidente no ta aceptabel. E victimanan ta ser humano cu famia y ser keri. Polis ta haci un yamada fuerte na tur conductor pa sigui reglanan di trafico y contribui na un trafico mas sigur.
Cuerpo Policial di Aruba ta manda su sincero condolencia na famia di e fayecidonan.
