Conseho Social Economico (SER) a entrega su conseho na Minister di Desaroyo Social, Trabou y Bienestar (SOAW), Charetti America-Francisca, encuanto e proposicion pa adapta salario minimo reglamentario cu ta planea pa drenta na vigor prome di januari proximo.
E proposicion ta pa indexa salario minimo bruto pa ora cu 1,8%, basa riba e promedio di 12 luna di
e indice di Prijs pa Consumido (IPC) te cu augustus 2025. Si aproba e medida, salario minimo bruto pa ora lo subi di Cg. 11,72 pa Cg. 11,93 (florin Caribeño), y e salario minimo bruto mensual corespondiente lo ta Cg. 2.066,28, segun e metodo di calculacion cu ta aplicabel.
E proceso pa yega na un conseho a tuma luga den un tempo rigor, considerando cu SER a ricibi e peticion formal pa duna conseho riba e concepto di e decreto ministerial concerni apenas dia 15 di december ultimo. Den su conseho, SER a analisa e proposicion den e cuadro huridico di e Ordenansa di Salario Minimo, teniendo na cuenta intencion dje legislado y exigencianan di siguridad huridico y transparencia. Tambe SER a pone e medida den e contexto socioeconomico actual di Corsou, uzando datonan disponibel riba prijs-, entradanan y dinamica riba mercado laboral, specialmente den sectornan caminda salario minimo ta predominante.
Mas aleu SER a analisa e base di e ahuste propone manera formula den e nota clarificatorio cu ta acompaña e concepto di e decreto ministerial di forma critico. E organo consultivo a wak specificamente si e cifranan den e nota ta coherente y basa riba pronosticonan di e cantidad di trahadonan cu lo beneficia dor di e indexacion.
Den e mesun contexto SER a tuma na consideracion un analisis di e impacto macroeconomico cu a ser prepara pa Ministerio di Desaroyo Ekonomiko, basa riba e modelo Curalyse, cu e “cautela” necesario cu semper ta conta ora ta trata di proyeccionnan ehecuta cu modelo.
E conseho di SER ta basa riba un investigacion profundo di literatura y descresearch pa motibo di e tempo hopi limita, den cua mester a emiti un conseho.