Hulanda ta keda reconoci internacionalmente pa su sistema di reciclahe avansa, conoci como “Statiegeld”. E modelo aki no solamente ta percura pa mantene e pais limpi, sino cu el a bira un fuente di entrada alternativo pa personanan cu ta enfrenta dificultad riba mercado laboral.
E sistema di “Statiegeld” ta funciona a base di un deposito riba boter di plastico y blikinan di refresco of cerbes. Ora un consumidor cumpra e productonan aki, e ta paga un porcion extra cu e ta haya bek ora e entrega e boter of bliki bashi den e mashinnan special na supermercadonan.
Un incentivo pa e ciudadano
E aspecto unico di e sistema aki na Hulanda ta e motivacion cu e ta crea den comunidad. No ta solamente e consumidor individual ta recicla su mesun desperdicio, sino cu e sistema a habri porta pa personanan cu pa un motibo of otro no tin un trabou fiho.
Banda di e companianan di limpieza cu ta wordo contrata pa mantene e areanan publico limpi, tin un grupo creciente di ciudadano cu nan mes un iniciativa ta recolecta boter y bliki bashi den parke, caya y tras di eventonan grandi. Pa e personanan aki, e “Statiegeld” ta fungi como un “incentivo boluntario” cu ta genera placa efectivo, contribuyendo asina na nan economia personal mientras nan ta haci un trabou esencial pa comunidad: mantene e pais limpi. Sinembargo no ta solamente esnan cu ta biba riba caya y of personanan cu no tin trabou ta haci esaki, pero mayoria studiantenan tambe ta haci esaki pa nan por ricibi un placa extra durante cu nan ta studia.
Eficiencia den limpieza publico
E sistema aki ta crea un balansa eficiente den e cadena di limpieza. Mientras e companianan oficial di limpieza por enfoca riba otro tareanan mas grandi of specialisa, e aparato di “Statiegeld” ta motiva e ciudadano pa colecta e desperdicio di mas comun prome cu esaki mes yega na e naturalesa of keda riba caya.
Asina, Hulanda ta logra un pais mas limpi sin cu mester di un supervision constante, transformando loke antes tabata “shushi” den un producto cu balor monetario directo pa esnan cu mas mester di dje.
Un sistema y of un idea cu Aruba por adopta di Hulanda ?
