ORANJESTAD /ARUBA,4 januari 2026 Despues di un conferencia di prensa y reunion cu lidernan di Parlamento, Prome Minister Mike Eman a confirma cu no tin indicacion cu Aruba ta den un situacion critico a causa di e desaroyonan reciente entre Venezuela y Merca. Segun gobierno, bida diario na Aruba por sigui normal y no tin motibo pa panico.
Gobierno di Aruba a ricibi informacion for di madruga y a activa e stakeholders relevante, incluyendo consulta cu e Conseho di Minister di Reino Hulandes, pa evalua e situacion y tuma e precaucionnan necesario. Segun Prome Minister, algun informacion comparti cu Parlamento no por divulga publicamente pa motibo di protocol.
Vuelonan entre Aruba y Merca a keda cancela te proximo aviso, y e situacion ta wordo monitoria di cerca. Sinembargo, gobierno a enfatisa cu Aruba ni Reino Hulandes no ta parti di e conflicto y cu solamente ta tuma medida di precaucion debido na e cercania geografico cu Venezuela.
Prome Minister Eman a recalca cu Aruba ta bon prepara. Tur departamento y instituto sa nan responsabilidad, y tin suficiente reserva di cuminda y fuel. Gobierno a pidi e comunidad pa no drenta panico ni haci compra excesivo, paso no tin necesidad pa esaki.
Gobierno tambe ta traha riba un sistema pa mantene contacto cu Arubiano nan den exterior, incluyendo esnan cu ta afecta pa cancelacion di vuelonan, pa por asisti nan cu informacion y regreso na Aruba.
Aeropuerto di Aruba a informa cu vuelo Avianca 242 ta cancela y a pidi pasaheronan pa tuma contacto cu nan aerolinea pa rebooking. Ademas, tin varios vuelo cu ta experiensa delay, entre nan American Airlines, Delta, JetBlue, United Airlines y KLM.
Gobierno a conclui cu, na e momentonan aki, Aruba por keda trankilo y cu tur actividad normal por sigui sin interupcion.