A para shofùr menor di edat
Den oranan di anochi di djamars 30 di desèmber, alrededor di 7.45 or, un patruya a mira un
outo ku sinku okupante na un lokalidat di hòreka na Kaya Korona, di kual e shofùr tabata
mustra hopi yòn. Pa e motibu aki e patruya a disidí di para e vehíkulo pa un kòntròl.
Durante e kòntròl a resultá ku e shofùr tabata un menor di edat di 16 aña. Pa e motibu aki e no
tabata disponé di un reibeweis i ademas el a duna un seguro ku no ta bálido. A transportá e
shofùr menor di edat pa warda di polis, di kua su mayornan tambe a presentá. A splika e menor
i su mayornan e seriedat di e situashon. E menor a deklará ku el a hür e vehíkulo pa un dia.
Polis ta atvertí pa komportashon peligroso ku vürwèrk durante kambio di aña
Den preparashon pa fin di aña i durante kambio di aña, ‘meldkamer’ sentral aktualmente ta
risibí un kantidat di notifikashon tokante molèster i situashonnan peligroso dor di vürwèrk.
Kuerpo Polisial Hulanda Karibense (KPCN) ta mira un tendensia prekupante di kua muchanan
òf hóbennan ta tira vürwèrk riba kas, vehíkulo, animal i asta riba otro.
Tira vürwèrk riba persona, vehíkulo, bestia òf edifisio no solamente ta kastigabel pa lei, pero
tambe sumamente peligroso. E komportashon aki por kondusí na leshon físiko grave, manera
kemadura. Ademas, vürwèrk por kousa daño material i esaki ta krea un sentimentu di miedu i
inseguridat den bario.
Polis ta hasi un yamada urgente na tur mayor i tutor pa nan ta alerta riba loke nan yu(nan) ta
hasi.
Papia ku bo yunan: Konsientisá nan riba e peliger di vürwèrk i e konsekuensianan di un
komportashon inresponsabel.
Mantené supervishon: Sa unda bo yu(nan) ta i ku kiko nan ta hasi pafó.
Responsabilidat: Tene na kuenta ku pa lei por tene mayornan responsabel pa e daño ku nan
yu(nan) menor di edat kousa.
Durante kambio di aña, polis lo vigilá èkstra i lo aktua ku man duru kontra mal komportashon ku
vürwèrk. Personanan ku hasi nan mes kulpabel di aktonan peligroso òf vandalismo ta riska di
keda detené òf ku polis ta konfiská nan vürwèrk.
Laga nos mantené e kambio di aña seif i festivo pa tur hende. Bo a mira un situashon peligroso?
Tuma kontakto mesora ku polis na 911.