Aña 2025 ta cera y 2026 ta habri cu sla di prijs tur caminda! tur dia prijsnan ta sigui
subi! .Aña 2025 lo wordo recorda como aña cu pueblo su cartera a haya castigo di prijsnan halto tur
caminda. Segun central bureau statistiek prijsnan di comestibel a subi asina hopi cu ni come na
cas y ni come pafo ta barata mas.
Un tin caminda mas pa scapa pa sla di prijs y pueblo no tin escape! Como si fuera poco aña 2026 ta habri cu aumento di prijs di pan. Un kipashi tabata costa 5 florin den 2025 y riba e prome dia di januari 2026 lo costa 5.75 florin, un aumento di 15%!
Den luna di November 2025, prijsnan di Food & catering services a subi cu 0,4 porciento
compara cu October 2025. Asina, e tendencia ascendente ta sigui, despues di un subida di 0,1
porciento den e luna anterior. Asina CBS ta informa. Tanto e costo di cuminda na cas como esun
pa come pafo di cas a aumenta, cu ta nifica cu consumidornan casi no tin opcion pa evita subida
di prijsnan. Prijsnan di cuminda na cas tambe a subi cu 0,4 porciento, segun parlamentario Dangui Oduber .
Den e categoria aki, nuebe di e 11 grupo di producto a subi. E subida mas fuerte a wordo registra na berdura, cu den un solo luna a bira 2,2 porciento mas caro. Lechi y webo a subi fuerte tambe cu 1,0 porciento, mientras fruta (0,7 porciento), bebida sin alcohol (0,5 porciento) y sucu y cosnan dushi (0,5 porciento) tambe a bira mas caro. E unico caida claro di prijs a wordo observa na papa y otro tuberculo, cu un caida di 1,2 porciento. Come pafo di cas, cu ta inclui restaurant y cuminda pa hiba, tambe a bira mas caro. E categoria aki a mustra den november 2025 un subida di prijs di 0,3 porciento.
Esaki ta nifica cu tanto casnan cu ta cushina na cas como hende cu ta depende di cuminda pafo di
cas ta confronta cu costo mas halto. Minister Wever a regala pueblo tambe un aumento di prijs di
gas cu te awe e no a baha bek pa pueblo.
Pueblo ta drenta supermercadonan cu miedo paso e costo di bida ta asina halto cu 100 florin ta
manera 10 florin. Nos pueblo a wordo priminti pa e gobierno di Avp-Futuro cu lo tin alivio, cu
costo di bida lo baha y cu frigidairenan lo ta yen bek. Awe e realidad ta otro. Tanto banco central
como central bureau statistiek a confirma cu prijsnan di comestibel a conoce aumentonan
explosivo y pueblo su cartera ta mas bashi cu nunca.
Unda cu pueblo bira tin sla di prijs. Prijs di awa no a baha, prijs di coriente no a baha!
Prijs di gasolin a wordo aumenta como regalo di Pasco di Geoffrey Wever, prijs di gas a subi y
prijs di cuminda y bebida a conoce aumentonan explosivo!
E alivio cu a wordo priminti NO ta wordo sinti, al contrario pueblo ta sinti su mes traiciona y
enganja. Frigidairenan ta mas bashi cu nunca, pueblo a wordo castiga cu aumento di prijs di gas
y awendia pueblo su poder di compra a bay atras cu stapnan grandi. Nada ta wordo haci pa
mehora poder di compra pa esnan cu ta gana sueldo minimo y esnan den clase media.
E bestaansminimum a bolbe conoce un aumento durante aña 2025, kiermen pa famianan
sobrevivi na Aruba a bira aun mas dificil y gobierno ta man crusa. Nos no ta mira accionnan pabo
y baha e costo di bida, mehora e poder di compra di esnan cu mas ta sintie den nan cartera.
E aña aki mester bini cambio pa asina esnan mas afecta sinti alivio. Tur supermercado cu pueblo
drenta nan ta mira cara di Geoffrey Wever riba shelf y a haya miedo di haci compras! Den un
pais caminda gobierno tin mas di 500 miyon florin di surplus ta inaceptabel cu tanto hende ta
sufri! E prosperidad no a wordo comparti manera a ser priminti!