Durante e di 36 Congreso di Reino na Hulanda, unda Aruba tabata representa pa Minister Geoffrey Wever, a sosode un situacion cu a preocupa y alarma tur e islanan den Reino. Durante un sesion, unda e minister actual di Aruba a haci un presentacion hunto cu e presidente di Cft, a resalta cu Aruba su gobierno ta bende un organo di supervision independiente na tur otro isla den Caribe. Pa fraccion di PPA, esey ta un señal alarmante: un minister no mester keda como salesman di Cft ni di un Rijkswet, cu por mara e autonomia y autodeterminacion di Aruba.
Un presentacion bunita cu un final peligroso
Segun Pieters, durante e di dos dia di congreso, Minister Wever a demostra un panaroma financiero bunita: Aruba ta saliendo for di su debe, debe externo a baha den 5 aña for di 127% di tempo di pandemia pa rond di 60% awor; tin surplus consistente; Aruba ta cumpli cu LAft y ta cumpli cu e norma di 1% di surplus; economia ta creciendo y ta stabiel. Tur hende a tende: Aruba ta canando riba un bon caminda cu su maneho financiero.
“Pero na final di e presentacion, a drenta un buelta peligroso: Minister Wever a indica cu gobierno ta cla y ta convenci pa pone Aruba bou di un Rijkswet pa supervision financiero. Esaki a causa un shock den e sala”. E pregunta cu mas a resalta tabata: “Si Aruba ta bayendo asina bon, pa kico nos mester mara nos mes den un Rijkswet? Dicon Aruba no ta scoge pa sigui fortalece nos mesun Landsverordening, evalua y mira con por cambia e LAft?”
Corsou y Sint Maarten cu aviso cu nos no por ignora
Minister di Corsou a hisa su man y a duna un mensahe bon cla na Aruba: “Lebumay e cuestion di un Rijkswet. Si bo hinca bo mes den un structura asina, bo no ta sali nunca mas for di dje!”
E delegacionnan di e otro islanan a haci e mesun pregunta y no por caba di kere cu Aruba ta cla pa entrega su autonomia y autodeterminacion:
“Con ta posibel cu Aruba, cu ta prepara pa celebra 40 aña di Status Aparte, ta dicidi di busca un Rijkswet, net awor cu e cosnan finalmente ta stabilisa?”
“Sint Maarten a ripiti nan mesun experencia: “Unabes bou di RAFT, practicamente no por sali for di dje”.
“Dicon kier bay contra di un desaroyo asina bunita y dal un stap atras, sali for di un ley local y pasa pa un Rijkswet cu alfin ta Hulanda ta dicidi? Esaki no ta desaroyo y crecemento di un pais den Reino”.
Segun nan, e caminda cu Aruba ta siguiendo ta pone nos autonomia y madures politico-financiero bou presion innecesario.
Alternativa di PPA: Begrotingskamer si, Rijkswet no!
Fraccion di PPA ya a presenta un Nota di Minoria basa riba e consultanan cu gremio, expertonan y a bin cu un alternativa concreto: lanta un begrotingskamer independiente, ancra den leynan local, bay den un dialogo serio cu Hulanda pa baha interes y fortalece disciplina presupuestario, sin mara Aruba den e Rijkswet HOFA y pone un paro na e proceso di Rijkswet. “Niun otro partido politico a bin cu esaki; paso esaki ta precisamente e tipo di solucion cu ta mantene nos autonomia, rekeri responsabilidad y evita ripiti eror di Corsou y Sint Maarten, cu tin un Rft, pero sin e resultado desea.
“Como Arubiano, mi a sinti mi decepciona y fastioso: en bes di hinca Aruba mas firme riba su propio pia, gobierno actual, via Minister Wever y Minister Eman, ta pusha pa un Rijkswet cu por horca nos maneho financiero pa generacion. Fraccion di PPA ta keda boga pa para e proceso di Rijkswet HOFA, traha diligentemente riba e begrotingskamer y salvaguardia nos Status Aparte den forma di nos autodeterminacion cu pueblo di Aruba a lucha p’e,” Eduard Pieters a finalisa bisando.
