KRALENDIJK, Bonaire
Kolegio Ehekutivo a tene su reunion semanal pa e biaha akí na Kunuku Bieu. Djárason 4 di mart Kolegio Ehekutivo a reuní na Centro Orkidia Profesor Alejandro Saleh na Nort Saliña. E sentro akí a habri na 1989 i su meta ta pa entretené hende di 60+ den Nort Saliña i bisindario. Despues di e reunion e kolegio a bai pone su mes na altura di e trabounan ku ta tumando lugá na Kaya Oneida direkshon di Skol Amplio Papa Cornes. E kolegio a bishitá tambe e edifisio kaminda Skol Amplio Papa Cornes tabata situá promé. Ta renobando e edifisio akí awor. Kuminsamentu di aña Kolegio Ehekutivo a disidí pa reuní un biaha pa luna den bario. E promé reunion den bario a tuma lugá na yanüari na sentro multifunshonal Cocari na Rincon. E plan ta pa tene reunion di e kolegio tambe na Antriol, Nikiboko, Playa, i Tera Kòrá. E siguiente reunion di e kolegio ta na Antriol.
