Inmortalisá Boneiru su lugá úniko i propio riba merkado
Tourism Corporation Bonaire (TCB) ta lansa un kampaña nobo riba medionan sosial: ‘Capture Bonaire, kompetensia di saka potrèt 2022’! E meta prinsipal di e kompetensia akí ta pa hasi e konsumidó mas konsiente di nos posishonamentu di marka, nos esensia i nos promesa. Banda di esaki nos ke sigui engrandesé nos enbolbimentu riba medionan sosial i nos kantidat di siguidó. TCB ta deseá pa su siguidónan partisipá na e kompetensia di saka potrèt akí pa medio di ‘upload’ nan mihó potrèt di Boneiru, Klein Bonaire òf nos Parke Marino den e siguiente kategorianan: nos bestianan (wildlife), nos paisahenan, nos bida bou di laman, preservashon di naturalesa, nos hendenan, nos historia i nos kultura.
E kompetensia ta habrí pa tur hende di 18 aña bai ariba ku tin un kámera òf telefòn i ku tin afinidat ku Boneiru i ku tin gana di laga otro hende mira kiko nos isla tin di ofresé. Esaki por ta nos habitantenan lokal òf nos bishitantenan.
E kompetensia ku ta dura kuater siman ta ranka sali dia 22 di ougùstùs i ta finalisá dia 19 di sèptèmber. Dia 23 di sèptèmber 2022 ta saka e tres ganadónan for di tur e potrètnan ku ta bini na remarke i ku a drenta riba www.bonairecampaigns.com. Partisipantenan mester kompartí e pòtrèt riba Facebook i Instagram i kòrda tèk @bonaireisland/@bonairetourism i usa e siguiente ‘hashtag’: #CaptureBonaire2022 #ItsInOurNature
E partisipantenan por gana e siguiente premionan:
Promé premio: Estadia durante wikènt pa dos persona na Bamboo Bonaire Boutique Resort
Di dos premio: Paseo riba boto di bela durante bahada di solo pa dos persona ku Melisa Sailing.
Di tres premio: Piknik riba bich pa dos persona ku Arena Picnic.
Ku e kampaña akí TCB ta ofresé nos poblashon lokal i bishitantenan di Boneiru un manera plasentero i kreativo pa eksperensiá nos isla den tur su bunitesa. #itsinournature