Tristeza ta sigui cana man den man cu alegria. Mientras tin famianan den nan tristeza, otro ta den pleno celebracion di un of otro motibo festivo. Lagami cuminsa cu duna tur lector un “bear hug”, esta un braza fuerte, aunke ketobay virtualmente. Nos tambe ta sigui cuida. Mientrastanto ya Aruba a tuma despedida di e gentil caballero , e motor baranca di Radio Galactica FM, e homber di deporte, socca calypso y mas, Roberto Geerman. San Nicolas, e pleinchi di Misa Sta. Teresita tawata e centro di emocion, lagrima y musica. Hopi ta e autonan cu a pasa “drive thru” y tambe esnan na pia, cu a bay bisa Roberto ayo y te despues. Entre otro, por a scucha dynamico Nico Conner riba su steelpan, e flamante cantante Inky Richardson cu e bunita cancion “My way” cu a bira “His way” y hopi mas di tur e ramonan den cual Roberto tawata activo cu su bunita energia, amor y passion. Lady Ruth a uni su mes cu su ex-coleganan di GFM den y dilanti Judra Building, Diasabra mainta, mas serca di cas, pa a tuma despedida di Roberto. Sr. Arends, Alexa Werleman y Joe Hernandez a hiba palabra y tur para dilanti di e edificio di e radio emisora, na unda Roberto a traha den su ultimo anjanan, a duna Roberto un fuerte y largo applauso. Entre otro tawata presente Victor “Toko” Winklaar di Awe Mainta on line y Raffi Williams di e edificio mini mall Judra Building. Nos por a tuma nota tambe di Louis Richardson un di e bunita caranan y curason di Dakota tur dia y Tico Bee, kende tambe tin hopi anja cu Galactica, Rowald Webb y mas coleganan di Roberto. Riba un tono mas alegre, Lady Ruth ta informa na tur amantenan lesado di boeki, cu Diasabra 5 di Februari awor lo tin firmamento di e buki nobo di e fantastico escritor Desiree Correa titula “ Drama Real”den e espacioso Plaza Bookshop. Hopi ta corda Nico Luydens na Van Dorp, awor Nico ta aporta y comparti y duna di su curason humilde tempo y capacidad profeshonal na su team nobo di Plaza Bookshop. Nico Luydens, conosi y stima pa su bunita pasonan bailabel den gruponan di scol di baile Diana Antonette. Un persona amabel y hopi pero hopi servicial, un dushi hende cu no tin parashon, simplemente e no por para keto. E ta gusta move traha y yuda duna un man unda cu por y awor lo duna hopi amor den su trabao cu Plaza Bookshop. Y Juffrouw Desi, cu tambe ta un sra dama hopi keri den comunidad. El a yega di duna cursonan den skirbimento, e.o. con pa skirbi un buki pa mucha na Biblioteca Nacional , hunto cu su amiga colega escritor y Poeta Olga Buckley. Bin hasi conosi di serca cu e bunita shon di hende aki, Desiree Correa , Diasabra dia 5 di Februari for di 11or di mainta te cu 1 or di merdia. Nico Luydens di Plaza Bookshop tin un line up di escritornan pa e siguiente Diasabranan, e.o. Olga Buckley, mi persona como Lady Ruth y tambe e curason y motor den turismo tempo di su tempo Rory Arends. E secuencia lo wordo anuncia riba fb y otro medianan social tambe. Pabien y hopi exito lieve Desi, cu bo buki cu un storia sumamente impactante “Drama Real”. Y na amigo Nico, bo deseo di bo curason a wordo cumpli, bo ta activo atrobe cu bo bunita trabao, e biaha aki na Plaza, despues cu bo mester a baha cu penshoen na Van Dorp. Dios conose tur nos curason, nos boluntad y energia. Exito den planea, organisa y ehecuta bunita actividadnan social cultural y den literatura na Plaza Bookshop. Y…..warda pida keeshi pa nos , for di e tremendo seleccion di keeshi obtenibel na Plaza Bookshop ! Na nos lectornan, un bon y felis resto di siman ! Be and stay safe ! Nos ta topa na Plaza Bookshop ! Love you too ! Lady Ruth ta hopi contento cu despues di hasi su Mani-y Pedicure serca lieve Regene Lake na Beauty Secret y mas, eymes riba e pleinchi patras na banda di Plaza Bookshop, e por drop in serca amigo Nico !
Twee vliegen in een klap, ya cu por scapa un crenchi plaka riba e gasolin ! Y…serca di cas !
