Willemstad – Resientemente, Minister Jesus-Leito huntu ku CARMABI a firma un akuerdo di maneho pa e promé área di ‘Specially Protected Areas and Wildlife’ (SPAW) na Kòrsou. E área di SPAW ta bira e promé área den laman teritorial di Kòrsou ku lei ta protehá.
Despues di un periodo largu di preparashon, e lei aki a drenta na vigor den 2019. Di tal manera, Kòrsou ta duna forma na diferente tratadonan internashonal ku nos ta forma parti di dje, manera entre otro e protokòl di SPAW, tratado di Laman (‘Zeerecht Verdrag’), tratado di Cartagena, i e tratado di Bio-Diversidat di Nashonnan Uni (UN).
Dor di apuntá i formalisá e área di SPAW aki, Kòrsou ta forma parti di un kadena di pais partner den laman Karibense, ku aktivamente ta protehá i mantené áreanan di balor ekológiko den laman. Esaki ta trese diferente benefisio pa nos, manera posibilidat pa investigashon sientífiko, rekreashon i turismo spesífiko. Protekshon di balornan ekológiko ta di importansha kultural i ekonómiko. E balornan ekológiko ta duna realsa na nos klima di bida i ekonomia
Curaçao Ports Authority (CPA) ta finansiá e promé 5 añanan di e protokòl aki.
A base di investigashon sientífiko, a resultá ku e área SPAW aki ta esun di mas mihó den region karibense pa loke ta e kalidat i diversidat di e ref. Dor ku a traha Megapir II riba un área di ref di haltu kalidat ku algun tipo di koral protehá, menshoná di e protokòl di SPAW, e koral nan lo a keda afektá. Aworakí, a establesé un forma di kompensashon mediante formalisashon i protekshon di e promé área SPAW.
E kuido di parti di Carmabi lo enserá: 1) vigilansha riba laman, 2) raportá aktividatnan ilegal na outoridatnan konserní, 3) buta i mantenshon di bui pa mara boto, paso no por tira anker mas einan. Tin pues un prohibishon pa tira anker, i mester pidi eksonerashon serka Minister di Tráfiko, Transporte i Planifikashon Urbano (VVRP). Solamente den kaso di emergensha i reskate, por tira anker.
