Riba 31 di yanüari 2026, Wardakosta a risibí un notifikashon den oranan lat di atardi di un
persona ku a indiká ku un boto di piskadó ku dos persona na bordo tabata pèrdí. E boto di
piskadó a sali for di Islanan Aves direkshon pa Kòrsou dia 30 di yanüari 2026, ku dos
hòmber di Kòrsou na bordo. Despues di a risibí e mensahe, e Sentro di Operashon
Maritimo (MOC) di Wardakosta, a base di kalkulashonnan, a traha un área di búskeda pa
buska e boto pèrdí. Tambe a saka mensahenan di UMIB i NAVTEX kual nan a ser mandá
pa barku i botonan den serkania di e área di búskeda, pidiendo nan pa yuda buska e boto
di piskadó pèrdí. Despues a dirigí e avion Dash di Wardakosta den bisendario di Boneiru
pa buska.
Awe mainta di 1 di febrüari 2026, MOC a risibí un mensahe ku un persona a mira un baki
grandi (un tipo di un jug grandi) entre e barankanan na Klein Kòrsou. Un ratu despues a
drenta un di dos mensahe di un persona ku a mira un jug grandi ta drif den awa na altura
di Oostpunt na Kòrsou.
Despues di un ratu e boto di plaser My Pearl a tuma kontakto ku MOC ku nan a risibí e
mensahe via VHF16 tokante e boto di piskado ku a pèrdè. My Pearl tabata nabegá for di
Boneiru direkshon di Klein Kòrsou i mesora a duna nan asistensia ku e búskeda. Abase di
e mensahenan ku a drenta, MOC a dirigí e avion Dash pa Klein Kòrsou pa bai tira un
bista. Djis despues, e boto di plaser My Pearl a informá MOC ku el a mira dos persona
den awa na altura di Klein Kòrsou. E hòmbernan tabata drif riba e tapa di un jug. E
tripulashon di My Pearl a saka ámbos persona for di awa i a mantené kontakto ku e MOC
durante e reskate. Na momento ku a saka e personanan for di awa e boto di plaser a
nabegá direkshon di Kòrsou, unda a pasa e dos hombernan pa un boto di patruya Metal
Shark di Wardakosta. E dos personanan a indiká ku nan tabata dos dia riba laman i ku
nan tabata hopi kansa. Na yegada na e pir di Wardakosta na Parera, e dos hombernan a
ser entregá na ambulance pa haña asistensha mediko.
Wardakosta ta deseá e dos hòmbernan pronto rekuperashon i ta gradisí e boto My Pearl
pa su yudansa i reskate di e dos personanan.
