Un biaha mas ta keda confirma cu MEP su desicionnan tabata responsabel y a crea un
fundeshi financiero fuerte pa Aruba
E siman aki Gobierno di AVP FUTURO a anuncia alivio pa pensionadonan. Mester recorda
pueblo cu e beneficio aki ta posibel danki na e BBO na frontera cu ta genera e extra
prima di BAZV cu ta fortifica e fondo di AZV.
Desde augustus 2023, e fondo di AZV ta keda fortifica cu prima di BAZV cu tambe ta keda
genera den e 100 miyon florin cu BBO na frontera ta trece den caha di gobierno. E extra
placa aki, awe ta duna AZV e stabilidad financiero pa por absorba e gastonan di e prima di
5% di AZV cu normalmente SVB ta paga pa e pensionadonan cu un pensioen bou di 30 mil
florin pa aña.
Ya cu SVB no mester paga e prima di AZV mas pa e pensionadonan, locual ta keda den e
fondo di SVB, awo lo keda destina pa por hisa e pension di biehes. Pues ta danki na e extra
placa cu BBO na frontera, AZV a wordo fortifica y espacio financiero a wordo crea pa duna
pensionado di SVB beneficio.
E mesun BBO na frontera aki cu poco luna atras tabata wordo grandemente critica pa e
propio ministernan Mervin y Eman y yama pa medida cu ta ranca placa di pueblo, awe ta
locual Mervin y Eman ta aprecia y wanta duro na dje. Awo ministernan Mervin y Eman no
por nenga cu cu e decisionnan cu MEP a tuma tabata responsabel y basa riba realidad
financiero, aunke nan no tabata popular na e momento.
MEP semper a tene cuenta cu e bienestar di pensionadonan. Hasta den temponan cu Aruba no
tabata financieramente bon, MEP a introduci diferente cambionan fiscal structural cu a yuda
pensionadonan y a fortalece nos sistema financiero. Asina a baha e prima di AZV di 10.5%
pa 5.0% riba e prome 30.000 di nan entrada, a hisa suma liber di impuesto na 30.000 florin pa
baha e peso fiscal specialmente di pensionadonan, a subi pensioen di biehes pa soltero di
1107 florin pa 1265 florin, y pa pareha casa di 1864 florin pa 2130 florin, a aumenta e
Reparatietoeslag di 100 florin pa 200 florin pa luna, y a separa cobransa di impuesto pa
pareha casa cu pensioen di SVb pa asina baha e peso fiscal pa pensionado.
Ademas, MEP a laga atras un finansa publico stabiel, cu ta e base financiero cu ta haci
posibel cu e tipo di yudansa social aki por wordo manteni y amplia. Un biaha mas ta keda
confirma cu MEP su desicionnan tabata responsabel y a crea un fundeshi financiero
fuerte pa Aruba.
MEP lo sigui traha, for di oposicion, pa defende interes di pueblo y pa cu pensionadonan
sigui ricibi e respet y siguridad cu nan merece.
Parlamentario Xiomara Maduro: Alivio pa pensionadonan awe ta posibel danki na e BBO na frontera
