Den ora nan di dialuna mainta, di 26 di januari, Centro Operacional Maritimo di
Wardakosta (MOC) a ricibi un yamada for di un barco di carga, den necesidad di asistensia
medico. E barco tabata nabegando cerca di Corsou.
Ta trata di un trahado riba e barco cu a bira malo. Coleganan di e tripulante a bin topa cu
e persona drumi riba suela den necesidad di asistencia.
Personal di MOC a contact e dokter di CITRO cu a constata cu e persona mester ricibi
tratamento medico na Curaçao Medical Center (CMC) mas lihe cu ta posibel.
Inmediatamente a alerta personal di e helicopter di Wardakosta pa sali den direccion di e
barco pa asina por hiba e pashent Hato (Corsou). Personal di ambulance tabata presente
pa transporta e persona pa asina e ricibi tratamento medico na Curaçao Medical Center
(CMC).