Drs. Anco Ringeling pa hopi aña tabata un di e pioneronan y cara principal di AZV. Su
persona a hunga un papel instrumental den e concepcion, preparacion y introduccion di
nos seguro AZV. Pa su papel instrumental aki, Gobierno di Aruba y Organo Ehecutivo
AZV a reconoce sr. Ringeling.
Trayectoria
Esaki a sosode durante e evento di desvelo di e logo di AZV relaciona cu 25 aña desde
introduccion di AZV. Durante e anochi ey, a para un rato keto na e trabounan grandi y
importante realisa pa drs. Anco Ringeling. Desde cu a cuminsa pensa riba e concepto
di AZV na 1988, sr. Ringeling tabata parti di e proyecto. Su persona a participa den e
proceso di formulacion di e ley cu a pasa Parlamento na 1992; conoce cada articulo y
motivacion nan tras. Despues, sr. Ringeling a dedica su mes na guia e fase mas dificil
di e trayectoria pa introduccion di AZV, esta cu mester a haci e calculacion di e prima di
e seguro y pareu cu esey, sr. Ringeling tabata responsabel pa organisa e aparato
administrativo pa e seguro.
Asina sr. Ringeling a bira e prome director di Organo Ehecutivo AZV na 1994. Den e
añanan di 1998 pa 2000, sr. Ringeling tabata tin un papel instrumental den e proceso
pa introduccion definitivo (pa publico) dia prome di januari 2001.
Palabra di sr. Ringeling
Sr. Ringeling e anochi aki a enfatisa e liderasgo di ex Prome Minister Henny Eman den
e introduccion di AZV. Asina el a conta cu Prome Minister Henny Eman tabata reuni
cada dos siman cu e team cu tabata encarga cu e introduccion pa monitorea y
garantisa cu e proyecto ta cana bon. Tambe el a para keto un rato na su recuerdonan
bunita cu e team di AZV di cual te cu awe ainda e ta topa algun di su coleganan.
Gradicimento
Di su banda, Prome Minister Mike Eman a mustra cu sr. Ringeling tabata man drechi y
man robes di ex Prome Minister Henny Eman. Indicando asina con importante e papel
di sr. Ringeling tabata den e proceso pa introduci AZV. Prome Minister Mike Eman a
expresa cu awe cu AZV ta cumpli 25 aña ta e momento indica pa reconoce e vision,
determinacion y perseverancia di drs. Anco Ringeling den e realisacion di nos seguro
AZV. Na nomber di Gobierno di Aruba, Prome Minister Eman y Minister Wyatt- Ras a
entrega sr. Ringeling e plakaat di reconocemento.Anco Ringeling
