Ayera den oranan di mainta a cuminsa core e informacion cu OM a dicidi di hala aden e apelacion cu nan tabatin contra di Melony Croes Paesch.
E caso aki a cuminsa 7 aña pasa ora cu a cuminsa investiga su casa Paul Croes, pa su actonan durante cu e tabata Minister di Labor. A papia e tempo ey cu e politico (su hendenan) tabata haya pago pa exoneracion di cierto procesonan y otorgamento di cierto permisonan. A papia di placa cu tabata haya pa esaki y a bisa cu tabata laba e placa aki via di e negoshi cu e casa di e politico tabatin.
A logra yega na un acusacion di labamento di placa y algo mas, pero Corte di Prome instancia a conclui cu e unico cos cu por a proba contra Melony tabata labamento di placa, pero su rol tabata asina chikito cu Hues a dicidi di dun’e un castigo den forma di trabou pa comunidad.
Melony sinembargo a bisa e tempo ey cu ta facil pa e tuma e castigo aki y sigui cu su bida. Pero a tuma un otro decision pasobra ta insisti cu e ta inocente. E tabata bou di e impresion cu a envolvi su persona den e caso aki solamente pasobra e ta casa di Paul Croes.
Despues di consulta el a dicidi cu e no ta bay acepta e castigo di trabou pa comunidad, cu ta algo cu facilmente e por a haci. El a prefera di apela e caso y bay apelacion, aunke esaki lo ta un peso financiero grandi. Pero e tabata kier a haci esaki pasobra su consenshi ta limpi.
Tres Corte di Hof a studia su caso y a yega na e conclusion cu di labamento di placa no por proba nada. Esaki a bini como un alivio cu pronto a caba den pesadiya ora cu nan a haya informacion cu OM no a keda contento y a dicidi di apela, pues a bay cassatie. Mester a sigui biba cu e situation cu e caso ta pendiente y pa nan sorpresa awe a haya informacion for di Hulanda cu OM no kier sigui mas cu e caso. Esaki ta nifica cu e sentencia di Hof ta esun cu ta keda valido. No a proba cu el a comete e delito di labamento di placa.