Featured Social

Premio excelencia de deporte a reconoce Romualdo ‘Roly’ Croes como baluarte deportivo 2021


Cera conoci un tiki mas di cerca cu sr. Romualdo Roly Croes, ken diasabra ultimo a wordo honra cu e reconocemento di Baluarte den Deporte 2021. Sr. Croes den añanan 60 y 70 a dedica su curpa y alma na e deporte di boxeo. Sr. Croes a bringa no solamente na Aruba, pero tambe den exterior. Sr. Croes a saca cara di Aruba unda cu e la bringa y hiba deporte di Aruba den e ring internacional.

Na edad di 13 aña sr. Croes a cuminsa den e mundo di boxeo bou guia di entrenandonan: sr. Fenchi Kock y sr. Battling Siki (George Pantophlet). Den peleanan amateur sr. Croes a gana sr. Buchi Orman y sr. Juan Blanco, ambos boxdo di Aruba. Na edad di 17 aña sr. Romualdo a wordo acerca pa entrenando sr. Osvaldo Mier pa bay train boxeo na Puerto Rico.  Dia 29 di juli di aña 1971, na edad di 19 aña sr. Croes a cuminsa cu su carera profesional. Dos bes sr. Croes tabata ‘top sparring partner’ pa ‘fighting’ Mack. Despues sr. Croes a haya ‘top fight’ contra di e boxdo sr. Eduardo Herrera y a bringa tambe contra di su top contrincante sr. Pedro Barcasnegras. 

Sr. Romualdo a yega di gana sr. Fredy Diaz cu a bringa despues contra di sr. Rigoberto Riasco kende tabata campeon di mundo e tempo ey. Despues sr. Croes haya un otro un oferta pa bay train na Colombia cu sr. Henry Castillo, pero a opta pa keda Aruba. Dia 4 di october 1974, sr. Romualdo Croes a bringa su ultimo pelea, despues di 2 aña sin box, contra sr. Achmed Hamoud di Curaçao y a gana e pelea aki. Despues di e pelea aki Romualdo a retira di mundo di boxeo. 

Premio Excelencia den Deporte y Minister Endy Croes ta felicita sr. Romualdo Croes cu e reconocemento Baluarte Deportivo 2021 danki pe dedicacion amor y aporte den e deporte di boxeo di Aruba. 

Related posts

AZV: Laboratorio di Servicio ta suspende su servicionan na asegurado di AZV

EA News Author

Boneiru ta introdusí un página ku pregunta hopi hasí tokante e Visitor Entry Tax

EA News Author

Prome Minister Evelyn Wever-Croes: Prome minister presente na acto di firma lease agreement pa edificio nobo pa maritiem politie

EA News Author

Leave a Comment