Den oranan trempan di mainta di awe, comunidad a keda conmociona cu e noticia tristo cu ciudadano Phil Odor a fayece na su cas. Odor tabata sinti malo pa algun tempo caba. Awe mainta el a sinti un dolor fuerte na su curason y a trata di haya yudansa na cas mes no a logra. Na momento cu paramediconan a yega na e sitio, nan a haci tur esfuerso pa rebib’é, pero sin resultado.
Phil Odor ta yiu di Cay Odor y e famia ta consisti di cuatro ruman, unda e tabata e mas chikito. E famia semper tabata caracterisa pa un union fuerte, y nan negoshi tabata di caracter familiar. Phil a bira un comerciante hopi conoci aki na Aruba, principalmente den transporte di carga maritimo pa hopi aña largo, trahando hunto cu su rumannan.
Ademas di su trabou den comercio, Odor a crea su nomber tambe den sector di entretenimiento. El a funciona como promotor di evento y, na diferente ocasion, a trece pa Aruba e famoso Coney Island, manera tambe Circo Aruba, brindando alegria y diversion na comunidad pa varios aña consecutivo. Tambe e la logra den mundo di wega di number ora cu e la lanta Big Wheel Lottery.
Phil Odor ta casa cu Utty Odor, y hunto nan tin dos yiu: James y Julisa Odor. Pa hopi hende e tabata simplemente Phil Odor, pero pa su sernan keri y nos directora di eanews e tabata Omo Phil ,un persona hopi aprecia, conoci pa su calor humano, su atencion y su deseo constante di uni hende. E tabata un consehero cu semper tabata dispuesto pa scucha y duna guia, sea cu un sonrisa of cu firmeza, y semper habri pa yuda unda cu e lo por.
Na famia di Phil Odor ta bay palabra di sincero condolencia y hopi forsa den e momentonan dificil aki.
Cu Omo Phil sosegá na Paz.
