Den e conferencia di prensa Presidente Trump a bisa cu, riba su orden, e Fornan Arma di Estados Unidos a ehecuta un operacion militar extraordinario den capital di Venezuela, Caracas. Segun Trump, e operacion a uza forsa militar abrumador for di aire, tera y laman, y a wordo describi como un di e accionnan militar mas poderoso, preciso y efectivo den historia di Merca.
E meta di e operacion tabata pa captura e dictador ilegítimo Nicolas Maduro y trese dilanti husticia Americano. Maduro y su casa, Cilia Flores, a wordo captura durante e operacion, sin cu ningun soldad Mericano a muri ni cu ningun ekipo militar a perde. Tur forsa militar Venezolano a wordo neutralisa rapidamente.
Trump a declara cu Maduro tabata e lider di un gran red criminal envolvi den narcotrafico y terorismo, responsabel pa manda cantidad enorme di droga mortal pa Merca, causando morto di miles di hende. Maduro y su casa ta indicta na Nueva York y lo enfrenta proceso legal den Estados Unidos.
E Presidente a anuncia cu Estados Unidos lo asumi gobernacion temporal di Venezuela te ora cu por realisa un transicion sigur, ordena y honesto. Segun Trump, Merca no lo laga otro lider corupto tuma poder atrobe. E plan ta pa reconstrui e infrastructura di petroleo cu companianan grandi Americano, inverti miles di miyones di dollar, genera entrada pa e pais y beneficia e pueblo Venezolano.
El a enfatisa cu Merca ta prepara pa un segundo atake militar mas grandi si ta necesario, aunke e prome operacion tabata asina exitoso cu probablemente no lo tin mester di un otro. Trump a bisa cu ningun otro pais den mundo por ehecuta un operacion di e nivel aki.
Tambe el a manda un mensahe fuerte na otro paisnan y grupo criminal: Estados Unidos no lo tolera ningun menasa contra su soberania ni su pueblo. El a declara cu hemisferio occidental awor ta mas sigur, cu Estados Unidos ta mas fuerte y mas respeta, y cu Venezuela tin oportunidad di bira un pais stabiel, sigur y prospero atrobe, cu paz, libertad y husticia pa su pueblo, incluyendo Venezolanonan cu ta biba na Estados Unidos.