ORANJESTAD,Aruba
Un biaha mas Club Universal ta organisa e competencia popular di Aruba: SesoSport y esaki ta tuma luga den cuadro di celebracion Dia di Betico.
Cual ta e mata crioyo di bario di Pos Chiquito / Sabana Basora y Bisindario? Ki dia Tata di Cultura Padu Lampe a fayece? Si bo gusta e tipo di weganan aki, anto bo ta un fiel amante di SesoSport.
Den cuadro di celebracion di Dia di Betico directiva di Club SV Universal ta organisa e evento aki riba diasabra, 25 di januari na e sede na Pos Chiquito / Sabana Basora. E evento ta cuminsa pa 7’or di anochi y ta calcula cu pa 10’or di anochi e lo finalisa.
Tin varios grupo inscribi y ainda tin espacio pa mas grupo. Pa mas informacion por yama of whattsapp 5941013, pero tambe bo por forma bo grupo y cana kibra diasabra pa 6.30 di atardi y registra di biaha na entrada. Por forma team di maximalmente 5 persona y inscripcion ta costa 25 florin pa grupo pa bo participa den Copa Betico Croes.
Bar y cushina ta habri y lo tin musica pa entretene esnan presente. Si bo no kier participam, djis bin apoya e gruponan of simplemente pasa un rato social den bario.
