Local

Studiantenan di Hulanda a completa nan programa di Fall Minor na IPA

Fall Minor 2020

ORANJESTAD,Aruba

“ Un experiencia inolvidabel. Berdaderamente nos a siña conoce Aruba den e cinco lunanan cu nos a sigui nos minor. Tabata hopi dificil pa mi a tuma despedida di mi alumnonan na mi scol di practica. Sigur lo mi regresa Aruba pronto.” 

“Un programa varia cu entre otro baile, idioma y historia di Aruba. Hopi excursion fascinante: core cabay, rutanan alternativo pa Hooiberg, hiking den Rooi Fluit y snorkel anochi na Mangel Halto”. Banda di e parti di educacion un tesoro di experiencia pa hiba bek Hulanda”. 

Esaki ta algun expresion di e studiantenan cu a participa na e Fall Minor Globalization, Diversity and Multilingualism cu IPA a ofrece durante e periodo di september 2019 te cu januari 2020. E minor aki tabata pa studiantenan internacional di Caribe, Latino America, Merca y Europa. Cu hopi entusiasmo y motivacion e studiantenan Fleur Meijer, Rianne Hommes, Bobby- Joy Kroon, Naomi Muller di Haagsche Hogeschool y Sophia Boulassouak, Danielle de Klein, Kristine Trimon y Heidi Aristizabal Rianos di Hogeschool Rotterdam a participa y a termina e programa cu exito.

E programa di International Fall Minor tabata enfoca riba Globalisacion, Diversidad, Multilingualismo y Enseñansa. Tambe tabatin un enfoke grandi riba desaroyo sostenibel delinea den e asina yama cinco P’s di sostenibilidad cual ta ‘Planet, People, Prosperity, Participatory Governance y Peace’. E meta tabata pa e studiantenan amplia nan horizonte, cera conoci cu e cultura y sistema di enseñansa di Aruba y haya conocemento didactico pedagogico, investigacion y tambe intercambia conocemento y experiencia.

E programa tabata consisti di diferente actividad multidisciplinario unda e studiantenan a participa na un serie di tayer, facilita pa varios docente di IPA y experto invita, riba diferente tereno manera: globalizacion, creolisacion, diversidad, arte y cultura, multilingualismo den enseñansa, sistema y maneho di enseñansa, investigacion y ciudadania. Nan a haci nan practica na diferente scol basico y scol secundario na Aruba. Tambe nan a haci trabao boluntario y participa na diferente excursion rond di nos isla na entre otro San Nicolas, Oranjestad, Hooiberg y Parke Arikok. 

Pa finalisa nan programa e studiantenan a presenta e resultado final di nan investigacion y nan experiencia en general. Nan a termina e programa cu un evaluacion oral exitoso pa cua nan a ricibi un certificado. E studiantenan a experiencia IPA y nan scol di practica como uno sumamento educativo, informativo y creativo. Nan a duna di conoce cu nan pasantia na Aruba tabata uno rico na experiencia. IPA ta desea e studiantenan un bon continuacion y finalisacion di nan estudio na Hulanda.

Related posts

Aruba Tourism Authority ta sigui sostene y fomenta bienestar di mascota na Aruba

EA News Author

Celebracion di Dia di Prensa cu hopi ambiente

EA News Author

Analisis weekend di Pasco na Departamento di Emergencia di Hospital

EA News Author

Leave a Comment

Whatsapp Message