ORANJESTAD, Aruba
E razon cu ta extende e REOI ta motibo di Covid
Despues cu Gobierno a anuncia cu lo cuminsa un proceso publico pa interesadonan expresa nan interes den e refineria y/of un industria alternativo, RdA a inicia e proceso, di acuerdo cu normanan di transparencia, nominando un oficina di notaris pa su ehecusion. Despues di Juni 8, 2020 e interes a cuminsa manifesta su mes caminda hopi compania, entidad y/of gruponan a cuminsa cana e proceso manera indica den e dos REOI nan. Periodicamente RdA ta wordo informa door di e oficina di notaris riba e proceso y cantidad di interesadonan registra. Den consideracion di e cantidad di interes ricibi pa ambos REOI-1 y REOI-2, y considerando cu notaris recien a avisa RdA cu un gran mayoria di participantenan a manda pidi tempo adicional pa por logra finaliza tur documentacion rekeri, RdA ta tuma e decision di extende e REOI-1 y REOI-2 te cu juli 31, 2020. E razon cu ta extende e REOI ta cu a consequencia di COVID-19 hopi departamento, institucion financiero y/of otro companianan den diferente paisnan no ta opera na nan horario normal, y consequentemente documentonan solicita y necesario no ta wordo procesa y/of entrega na tempo.
Consequentemente, e ‘REOI-1 & REO-2 Public Notices’ como tambe section 4.4 di e ‘REOI-1 & REOI-2 Documents’ a keda amienda y re-instala cu e fecha limite di entrega nobo di dia 31 di Juli 2020. Tur otro seccion di e REOI a keda mesun cos, sin nigun cambio, y ta keda vigente.