Como preparacion pa Wings of Hope su SDG School Champion Challenge 2022:
Aruba Airport Authority N.V. (AAA) su “Wings of Hope” (WoH) conhuntamente cu Grant Thornton Aruba a organisa un seminario riba Diasabra Maart 26, 2022 pa e scolnan cu lo participa den WoH su Sustainable Development Goal (SDG) School Champion Challenge 2022.
Un total di 16 scol a participa den e seminario pa SDG School Champion Challenge 2022. E programa di e seminario tabata yena cu diferente presentacion, incluyendo e instrumentonan necesario pa por prepara un plan sostenibel y solido y un competencia amistoso. Pa e prome parti di e seminario, Grant Thornton Aruba a duna un presentacion di e 17 Sustainable Development Goals di Nacionnan Uni sigui pa un presentacion di WoH su 3 proyectonan ehecuta na 2020, e 4 proyectonan ehecuta na 2021 y 6 proyecto cu ta andando of ta plania pa 2022. Durante e di dos parti di e seminario, Grant Thornton Aruba a duna e scolnan un presentacion con pa traha un plan sostenibel y budget solido y con esaki mester wordo yena y e puntonan importante cu mester tene cuenta cune. Pa completa e seminario, e scolnan a wordo reparti den grupo pa un competencia amistoso basa riba e SDGs. Cada grupo tabatin 30 minuut pa presenta un plan sostenibel usando un budget specifico y escohiendo 1 of mas SDG como nan meta principal. Na final di e tempo, cada grupo mester a presenta nan plan sostenibel na WoH, Grant Thornton Aruba y SDG Aruba.
WoH, Grant Thornton Aruba y SDG Aruba tabata sumamente impresiona cu cada grupo nan creatividad, escogencia di SDG pa nan plan sostenibel, reparticion di budget y comprendimento di e concepto. E scolnan tabata masha entusiasma y cla pa cuminsa traha riba nan scol su plan sostenibel cu lo mester wordo entrega na WoH pa Mei 13, 2022 caminda cu e scol ganador lo ricibi AWG 20,000.00 pa ehecuta nan plan.
AAA WoH y Grant Thornton Aruba ta sumamente contento cu e asistencia di e scolnan na e seminario di SDG School Champion Challenge 2022 y ta sigur cu e presentacionnan y instrumentonan ricibi, e scolnan lo entrega un plan sostenibel solido na WoH.
