Curaçao Sea Aquarium, Queen Conch Hatchery i Corendon Resorts a inisiá djarason ku un proyekto pilot pa reintrodukshon di karkó (Aliger gigas) den bahia di Corendon Mangrove.
Den kuadro di e proyekto aki a pone djarason 20 karkó (10 macho i 10 hembra) den e área di barankanan bou di laman den e bahia di Corendon Mangrove. Segun investigashon anterior, e área aki ta un ekselente lugá pa alimentashon i bibienda pa e karko. Den e área aki a yega identifika ehèmplar di karkó ku ta traha e lugá nan habitát natural.
E meta di e proyekto pilot aki di Curaçao Sea Aquarium i Queen Conch Hatchery, ta pa investigá si karkó por reproduse éksitosamente den e bahia di Corendon.
“Corendon Resorts ta sumamente kontentu di por kolaborá den e proyekto aki. Sostenibilidat i protekshon di naturalesa na Kòrsou ta masha importante pa nos, i ku e kolaborashon ku Curaçao Sea Aquarium i Queen Conch Hatchery nos a logra un partisipashon hopi bunita,” asina Biray Ogut, director-general di Corendon Hotels ta deklara.
Segun e sientifikonan involví, e perspektiva ta hopi prometedó. E sientifikonan lo monitorea semanalmente e desaroyo i progreso di e populashon durante e periodo di broei, ku ta kore anualmente di juli te ku november.
E karkó ta un asina yamá zeeslak di famia Strombidae. E espesie aki ta komun den Karibe, pero ta keda mas i mas amenasá pa sobrepeska i pèrdida di habitát. Ku e inisiativa aki ta spera di por kontribuí na restourashon i protekshon di e espesie ikoniko aki.
