Despues di e anuncio reciente di Prome Minister Mike Eman tocante su vision pa desaroya un “Port Town” riba e tereno di Port City, Parlamentario Dangui Oduber a presenta un serie di preguntanan na Parlamento pa busca claridad riba e plan aki.
Segun Oduber, tin hopi aspectonan cu mester wordo aclaria, manera: si ya a discuti e vision aki cu entidadnan relevante manera APA NV, ATA y gremionan comercial, y si desaroyadornan local y internacional lo tin e mesun oportunidad pa participa den un proceso habri y transparente.
Pa Oduber ta importante pa sa si tin e garantia cu e proyecto lo keda berdaderamente pagabel pa famianan cu entrada mediano y exclusivamente pa mercado local y cu e identidad Arubiano no lo bay perdi den un modelo importa. Ademas, e ta pidi claridad riba criterianan pa scoge desaroyadornan, si lo tin un destaho publico y si tin un comision cu lo guia e proceso.
“Gobierno a bisa cu kier move relativamente rapido pa combati escasez di vivienda,” segun Oduber. “E pregunta ta con lo evita cu rapidez no compromete ni calidad di casnan, ni infrastructura, y si no tin otro area(nan) mas logico pa desaroya un residencia mas grandi manera e tereno di refineria.”
Oduber ta pidi cu Prome Minister Eman comparti cu Parlamento tur estudio of evaluacion cu a wordo haci te awor, pa asina pueblo por haya claridad y transparencia den un proyecto cu tin tanto impacto riba futuro di Aruba.
