Minister di Husticia mr. drs. Arthur Dowers, a asisti na e premiere di un pelicula cortico produci pa CMMA relaciona cu traficacion y abuso di hende. Durante e presentacion, invitadonan por a presencia un storia di un bisiña cu ta abusa di tres dama stranhero den forma di labor erotico online. Ta cu mal presentimento, un welo cu ta biba otro banda di caminda a detecta cosnan cu no ta normal y a inicia cu su observacion cu a culmina den desmantelacion di e operacion ilegal aki.
E campaña di CMMA ta pa crea conscientisacion den comunidad pa tin un wowo critico riba posibel casonan di traficacion y abuso y pa meld cualkier sospecho na autoridadnan competente. Ademas e ta enfoca riba e victima cu tambe tin derecho y ta conscientisa nan tambe riba e camindanan pa cana si nan ta victima di traficacion y of abuso.
CMMA su rol ta pa haci investigacion di casonan di abuso y traficacion di hende, studia e tendencianan cu ta keda cambia y raporta esakinan na demas autoridad pa inicia e investigacionnan.
Minister Dowers a subraya e importancia pa comunidad ta critico pa cu abuso y traficacion di hende y tuma accion. Ignora casonan asina no ta un opcion si kier yuda combati e fenomeno aki cu lamentablemente tambe ta pasa cu frecuencia na Aruba. Ta pa e motibo aki tambe cu Miniser Dowers a introduci e maneho di regularisacion pa stranheronan indocumenta. Minister Dowers ta na altura di casonan caminda cu personanan local ta atrae stranheronan pa bin traha na Aruba cu un cantidad di promesa, pero ora yega Aruba ta hinca nan den container como vivienda, duna nan lo minimo na cuminda y paga salarionan no acorda mientras ta kita nan paspoort. Dunando nan e opcion pa legalisa y educando nan di nan derechonan, e ta empodera e personanan aki pa por yuda nan mes na momento cu nan bira victima di abuso of traficacion.
