Durante e disertacion di Parlamentario Eduard Pieters den e reunion publico di ayera, el a presenta no solamente su preocupacion y critica constructivo, pero tambe alternativa realistico y constructivo pa e crisis di confiansa cu e Rijkswet HOFA a crea den henter comunidad y Parlamento. Segun fraccion di PPA, e unico alternativa pa Rijkswet HOFA ta para henter e proceso aki, cuminsa cu dialogo y forma un frente nacional.
PPA su Nota di Minoria
“Nos a comparti nos puntonan firme cu tur parlamentario y minister y nos a entrega un Nota di Minoria, cu ta un documento cu ta propone un caminda realistico y ehecutabel pa pais Aruba.”
Pieters a insisti cu Aruba a demostra di disciplina y capacidad financiero, inclusivo durante e pandemia, sin dependencia di e ley di control for di Hulanda. “Aruba a mustra cu por maneha su propio finansas cu responsabilidad. Si nos kier adapta LAFT, nos por negosha y cambia via dialogo, pero no via un herment cu ta impone.”
Un Invitacion Na Tur Partido Pa Pone Aruba Prome:
Pieters a manda un mensahe poderoso pa tur su coleganan den Parlamento:
“Mi no ta para aki pa punta dede di ken tin culpa, ken a traha kico, etc.. Mi ta para aki pa baha bandera di partido y pone e di Aruba prome cu tur cos.”
Pieters a indica tambe cu fraccion di PPA a entrega dos mocion di sumo importancia, unda cu ta duna oido na esunnan cu Parlamento ta representa:
1. Un mocion pa instrui gobierno pa cuminsa un proceso nobo di dialogo y consulta cu gremio comercial, sindical, social y parlamentario.
2. Un mocion pa forma un Frente Nacional, pa forma un cuerpo uni cu un vision comun riba supervision financiero, funda riba confianza y respet mutuo.
Finalmente Pieters ta comparti cu e ora a yega pa Parlamento scucha e bos di su pueblo cu e ta representa. Esaki no ta un lucha di partido, sino un deber moral y patriotico pa defende nos autonomia, nos constitucion y nos futuro como pais. Aruba a gana su libertad cu lucha y sacrificio y nos no por entrega esaki pa miedo y mucho menos pa interes personal. E bos di pueblo ta cla: Aruba kier respet, transparencia y liderazgo cu dignidad. Fraccion y partido di PPA ta haci un apelacion na tur fraccion, tur gremio y tur ciudadano, pa nos uni forsa den un frente nacional, pa defende loke nos antepasadonan a crea. Nos autonomia no ta un regalo, e ta un responsabilidad sagrado y nos lo sigui para firme pa pueblo, pa pais y pa e dignidad di Aruba.
Press release: Partido Patriotico Arubano (PPA)