TCB ta informá
Tourism Corporation Bonaire (TCB) a kompartí informashon turístiko preliminario pa luna di òktober 2025, for di kua ta resultá ku Boneiru a risibí 15.717 bishitante stayover. Esaki ta un oumento di 9,1% kompará ku luna di òktober 2024, ora ku 14.406 bishitante a yega nos isla.
E bishitantenan for di Hulanda a forma e grupo di mas grandi, representando 49,8% di e kantidat total di bishitante (7832). E bishitantenan for di Merka tabata e di dos grupo mas grandi, esta 18,5% di e kantidat total di bishitante (2905).
En total 2662 bishitante (16,9%) for di Kòrsou a bishitá nos isla, siguí pa Aruba ku 365 bishitante (2,3%), Bélgika ku 339 bishitante (2,2%), Alemania ku 279 bishitante (1,8%), Suisa ku 123 bishitante (0,8%), Colombia ku 114 bishitante (0,7%), Canada ku 99 bishitante (0,6%), Reino Uní ku 88 bishitante (0,6%) i Brasil ku 83 bishitante (0,5%).
Mayoria di e bishitantenan for di Merka a biaha ku un partner, siguí pa esunnan ku a biaha nan so. Mayoria a bini pa sambuyamentu (51,4%), pa vakansi (36,8%) i pa bishitá amigu i famia (2,4%). Mayoria di nan a hospedá den un hotèl (59,5%), un vila (8,3%), un bibienda propio (6,3%), un apartamento (6,3%) òf serka un miembro di famia (4,4%). E bishitantenan for di Merka a bini prinsipalmente for di Florida, California, Texas, New York i North Carolina. For di e repartishon di edat ta resultá ku e biaheronan di 55 pa 64 aña a representá 27,6% di e bishitantenan, miéntras e biaheronan di 65 aña bai ariba a representá 22,9% di e kantidat total di bishitante.
Mayoria di e bishitantenan for di Hulanda a biaha ku un partner, siguí pa esunnan ku ta biaha nan so. Mayoria bishitante a bini pa vakansi (66,7%), pa bishitá amigu i famia (11%) i pa negoshi (7,8%). Mayoria di e bishitantenan a hospedá den un hotèl (47,8%), siguí pa un apartamento (15,4%), serka un miembro di famia (10,6%), den un vila (6,8%) i den nan propio bibienda (5%). Mayoria di e bishitantenan hulandes a bini for di Zuid-Holland, Noord-Holland, Noord-Brabant, Gelderland i Utrecht, kaminda e grupo di edat di 55 pa 64 aña (20,6%) i e grupo di edat di 45 pa 54 aña (18,4%) a forma e segmentonan di mas grandi.
Pa mas informashon tokante Boneiru su prestashonnan turístiko, bo por bishitá www.bonaireisland.com òf bo por tuma kontakto ku nos via info@bonaireisland.com.
