Barbara Wolfensberger ta bira director-general di Relacionnan den Reino na e ministerio di Asuntonan Interno y Relacionnan den Reino. E conseho di minister a bay di acuerdo cu e proposicion di minister Rijkaart di Asuntonan Interno y Relacionnan den Reino pa esaki. E nombramento ta drenta na vigor entrante prome di februari 2026.
E directorado general di Relacionnan den Reino (DG KR) ta responsabel pa colaboracion entre Hulanda y e paisnan Aruba, Corsou, Sint Maarten y e islanan Boneiro, Sint Eustatius y Saba. Aki ta trata di conseho di maneho y sincronisacion interdepartamental y e planificacion, set-up y ehecucion di programa- y proyectonan di stimulacion riba e tereno aki.
E tarea pa e director-general di Relacionnan den Reino pa cu esaki ta pa denter di e colaboracion aki, pa e añanan venidero, trece facilidadnan manera vivienda, e red di caretera y desaroyo di bario, riba e islanan na nivel y pa engrandece e resistencia y independencia economico di e islanan. Esaki ta exigi forsa impactante, diplomacia, un acercamento integral y habri y ekivalente. Pa cu esaki conocemento profundo y comprension di e contexto, desaroyo y sensibilidad di e diferente partinan di Reino (geografico, historico, y administrativo) ta sigur esencial. Ta spera di e DG KR tambe pa e guia e reorganisacion di DG KR den e direccion corecto, cu atencion pa e carga di trabou y e input di diferente perspectiva.
Vincent Roozen, secretario-general di BZK:
‘Mi ta entusiasma cu e yegada di Barbara. E ta un director-general cu a custumbra di colabora tanto den e campo di forsa compleho di Den Haag como riba e islanan. Ademas e tin hopi experencia cu traha pa y sostene ministernan. Su vision riba colaboracion ekivalente y su habilidad pa duna guia tanto di manera strategico como empatico ta hasi’e particularmente adecua pa e funcion aki. Door di su enfoke riba conecta, scucha y compronde, e ta e persona ideal pa crea brugnan entre Den Haag y e islanan Caribense den Reino.’
Barbara Wolfensberger:
‘Mi ta realmente ansioso pa hinca mi curason y alma den esaki pa hunto cu mi coleganan den e parti Caribense di Reino y Den Haag hasi un impacto positivo riba e islanan Caribense den Reino. Tin hopi topico cu ta conectá nos; pa cu esaki gustosamente mi ta busca profundidad y conexion. Tambe den e ministerionan na Den Haag nos por pone mas enfoke pa empeña nos mes di manera dirigi, cla y cu experticio pa un miho colaboracion y adelanto den y cu tur cu ta forma parti di Reino. Esta un reto bunita!
For di 2017 Barbara Wolfensberger ta director-general di Cultura y Media na e ministerio di Enseñansa, Cultura y Ciencia. Banda di esaki, denter di e directiva di OCW, e tin encargo di e cartera pa e partinan Caribense di Reino pa loke ta trata tur topico di OCW. Prome cu esaki e tabata Chief Marketing Officer pa Telegraaf Mediagroep, y di 2014 pa 2027, presidente di e Sector Top Industria Creativo na ministerio di Asuntonan Economico. Prome e tabata tambe Chief Executive Officer na FHV BBDO y Head of Corporate Identity & Communications na HEMA. Barbara a studia comunicacion na Hogeschool van Utrecht.
E nombramento aki a bin via e procedura pa e grupo di maneho halto di e Servicio Administrativo General, e asina yama ‘procedure voor de topmanagementgroep van de Algemene Bestuursdienst’. E Directorado-General di Servicio Administrativo General a realisa e reclutacion pa e nombramento y a sostene e ministerio di Asuntonan Interior y Relacionnan den Reino cu e seleccion. Manera ta custumber a publica e vacatura ampliamente pa asina tur hende por a aplica.
Press release: SSO CN
Rijksdienst Caribisch Nederland