Vota contra mocion pa yuda studiantenan ricibi un perdon parcial di deuda, den Parlamento a keda como un golpi duro pa varios hoben Arubiano cu ta sigui nan estudio, tanto na Aruba como na Hulanda. Un mocion pa crea un mecanismo di kwijtschelding (perdon parcial di deuda) pa prestamonan di estudio no a pasa, despues cu fraccionnan di AVP y FUTURO a vota contra e propuesta.
Parlamentario Edgar Vrolijk, cu a presenta e mocion, a enfatisa cu Aruba mester apoya su hobennan cu ta inverti den nan educacion, sin importa si nan ta studia localmente of na exterior. Segun vrolijk, durante su bishita oficial na Hulanda y e encuentronan cu studiantenan Arubiano, repetidamente a scucha nan preocupacion riba cargo financiero di prestamonan, tanto di DUO como di Aruba Lening, y e dificultadnan cu esaki ta crea pa nan por bin traha bek Aruba.
Entre e preocupacionnan principal ta vivienda, deudan di estudio y e condicionnan estricto cu ta aplica pa haya un descuento di 30% riba Aruba Lening. Segun e ley actual, studiantenan cu paga e 30% mester compromete pa traha minimo cinco aña na Aruba. Si un studiante paga e 70% restante via un lening y despues dentro di tres aña dicidi acepta un oferta di trabou na exterior, e 30% cu a wordo pordona mester wordo paga atras, creando insiguridad y desestimulo pa mobilidad laboral.
Vrolijk a califica varios di e disposicion nan den e ley como poco practico y desalentado pa hobennan cu ta pensa den bay bek Aruba. Pesey mes durante e tratamento di e presupuesto na comienso di 2025, vrolijk a presenta un mocion pa solicita na e ministerionan concerni — en particular e Ministerio di Finansas pa uza un “landbesluit “pa crea un forma di “kwijtschelding” dentro di marco legal existente, sin cu mester cambia e ley.
Sinembargo, e mocion no a haya suficiente sosten den Parlamento. Segun Vrolijk, oposicion, principalmente fraccionnan di AVP y FUTURO, a scoge politica partidista riba interes di e futuro generacion di Aruba.
E tema a wordo discuti repentinamente cu studiantenan durante e reciente reunion di IPKO na Hulanda, unda delegacionnan di tur fraccion a reuni cu hobennan na e Haagse Hogeschool. Studiantenan a ripiti nan peticion pa alivio financiero y tur fraccionnan a compromete pa traha riba e tema.
No obstante, ora e momento di votacion a yega, AVP y FUTURO a vota contra e mocion. Segun Vrolijk, su fraccion a presenta e propuesta previamente na e lider di fraccion, incluyendo e lider di AVP, cu oportunidad pa haci cambio y amplia e sosten. A pesar di esaki, consideracionnan politico a prevalece, y e votacion final a resulta den rechaso di un medida cu tabata destina pa yuda hobennan studiante.
E resultado, segun Vrolijk, ta cu varios di studiantenan na Hulanda y na Aruba a wordo priva di un oportunidad real pa alivio financiero, na un momento cu Aruba ta desesperadamente necesita di su hobennan prepara pa contribui na desaroyo di e pais.