Despues di un celebracion basta confuso di 40 aña di Status Aparte y 50 aña di nos Himno y
Bandera, parlamentario Eduard Pieters di fraccion di PPA ta bolbe ati alarma serio: proceso
alrededor di e Rijkswet HOFA no ta solamente cuestionabel, sino peligroso y totalmente
antidemocratico.
Siman pasa, riba iniciativa di fraccion di PPA, awe a convoca un encuentro publico cu e 13
representantenan di e gremionan pa duna bos na e gremionan cu ta representa e trahadornan
y interes di pueblo di Aruba. Pero manera presidente di Parlamento a dicidi di conduci e
reunion, segun Pieters, ta mustra mas un tendencia preocupante: silencia e bos di pueblo den
Parlamento mes.
5 Minuut pa pueblo…Un falta di respet institucional
A manda e invitacion pa e reunion dialuna, pues den menos di 72 ora di aviso, poniendo presion
riba e gremionan pa organisa nan presencia. Sinembargo, apesar di e limitacionnan, e
gremionan a presenta nan mes cu determinacion pa defende nan posicion riba HOFA.
Pero e trato cu nan a haya den Parlamento, segun Pieters, ta simpelmente inaceptabel.
“Duna nos unicamente 5 minuut pa presenta y pa haci pregunta riba un tema asina serio, ta un
manera elegante y autoritario pa silencia e representantenan di pueblo,” Pieters a declara. Pa
PPA, esaki ta un falta di respet pa democracia.
Coalicion silencioso, oposicion cu presion
Segun Pieters, e actitud di coalicion durante e encuentro tabata igual preocupante. Durante
gran parti di e reunion, mayoria parlamentario a keda den silencio, sin cuestiona ni confronta e
informacion presenta pa e gremionan.
“Tabata te ora oposicion a cuminsa presiona cu e preguntanan serio, cu algun miembro di
coalicion a reacciona,” Pieters a indica. “Y esakinan tabata speech sin direccion, sin contenido
real y te hasta tin un miembro di fraccion di AVP tabatin e curashi di cuestiona sindicatonan,
caminda cu nan mes a bay campaña y bisa nan votadonan cu nan ta contra Rijkswet y awe nan
gobierno ta pro Rijkswet” Mas cu claro esaki ta refleha un problema mas profundo: “E
parlamentarionan di coalicion ta comporta mas como representante di gobierno, en bes di e
representantenan di pueblo”.
Gremionan a representa pueblo mas cu parlamento
Un punto contundente cu a sali for di e encuentro tabata cu, segun Pieters, e sindicatonan a
mustra mas liderazgo den defende interes di pueblo cu e propio parlamentarionan di coalicion.
“Ta parce cu e 13 representantenan di e gremionan tabata defende pueblo mas cu e
parlamentarionan di AVP y FUTURO,” Pieters a expresa. “Y esaki pueblo di Aruba no mester
acepta.”
E critica aki ta toca e esencia di democracia: Parlamento ta existi pa representa pueblo, no pa
valida decision di gobierno sin cuestiona.
HOFA: Sin consenso, sin legitimidad
Centro di e debate ta e Rijkswet HOFA, un ley cu segun gobierno ta necesario pa disciplina
fiscal, pero cu segun PPA ta representa un riesgo directo pa autonomia y autodeterminacion di
Aruba.
Segun Pieters, un consensusrijkswet mester tin consenso real, no solamente di gobierno, pero
di Parlamento y pueblo.
“Aworaki, ni Parlamento, ni pueblo, cu ta representa pa e sindicato- y gremionan, no ta di
acuerdo. Pues con nos por papia di consenso?” Pieters a cuestiona.
Pa PPA, proceso actual ta un ehempel cla di bypass di Parlamento y un falta di respet pa
procedimento democratico.
Alternativa real: Disciplina sin perde autonomia
Pieters a enfatisa cu PPA no ta contra disciplina fiscal. Al contrario, e fraccion ta proponiendo
alternativa concreto: fortalece supervision financiero via un begrotingskamer local, dentro di
marco constitucional di Aruba. E argumentonan financiero tambe ta fuerte:
● Debe di Aruba a baha di 117% di GDP na 64% den 5 aña
● Proyeccion ta cu esaki lo baha te 50% pa 2030
“Si nos ta demostra disciplina financiero, pakico nos tin cu entrega nos autonomia y
autodeterminacion bou di un Rijkswet?” Pieters a puntra.
Un momento di decision pa pueblo di Aruba
Pa Pieters, e situacion aki ta hopi mas cu un debate tecnico. Ta un momento decisivo pa
democracia y autodeterminacion di Aruba.
“Si Parlamento no tin bos ni voto real riba decision financiero, pakico pueblo mester vota?” el a
cuestiona. Segun Pieters, si implementa HOFA sin resistencia, Parlamento di Aruba ta core e
riesgo di perde su rol esencial.
Finalmente Fraccion di PPA ta bolbe haci un yamada pa crea un frente nacional hunto cu e
sindicatonan, e gremionan comercial y pueblo, pa mustra Hulanda claramente cu no tin
consenso riba HOFA y trece e alternativanan cu PPA ta propone “Nos ta dispuesto pa
supervision, pero den un forma cu ta respeta nos autonomia y autodeterminacion,” Pieters a
conclui.
