Den e ultimo parti di e declaracion di presidente di Comerciantenan UNI Frans Ponson, e enfasis a keda poni riba e frustracion profundo cu ta existi debi na e falta di handhaving (cumplimento y control di ley) den tur e sectornan di nos comunidad. Desde e mercado informal, casnan di alohamento estilo Airbnb, te na leynan basico di trafico y bienestar di animal, e inaccion di autoridadnan ta castiga e ciudadano y comerciante cu sí ta cumpli cu ley.E situacion aki por crea un mal nomber pa Aruba , enbes di ta para pa e cosnan corecto ta apoya cosnan incorecto.
Comerciantenan legal ta pagando pa esnan cu no ta cumpli
Un di e ehempel nan mas cla di e falta di e pago di pension obligatorio pa trahadonan. Mientrastanto cu un comerciante legal ta haci e esfuerso pa deduci y paga e pension cu ta coresponde na su empleado, hopi negoshante informal nunca no ta pagu’e y ta keda sin ricibi niun tipo di sancion. Con por ta ?
Presidente di CUA a cuestiona fuertemente con por ta posibel cu den un isla chikito unda tur hende sa ken ta e negoshinan ilegal sea riba caya, riba internet, of den e sector di alohamento informal,ta entrega na autoridadnan “denuncia y prueba” ora cu e realidad ta ariba caya y na bista di tur hende. “E no ta un secreto, e no ta scondi, nos tur sa di dje y nada no ta wordo haci , esaki kiermen cu e gobierno AVP-FUTURO of instancia nan ta ok cu ilegalidad na Aruba? Un sistema coruptivo ?
Leynan nobo pa miho imagen politico en bes di aplicacion di ley
E mentalidad di e gobernantenan cu ta prefera di bin cu leynan nobo djis pa “bati riba nan pecho” y busca voto, en bes di aplica y drecha e leynan cu ya caba ta existi , ta un situacion di lamenta, aki na Aruba,ta mira claramente no ta traha pa drecha un Aruba , pero ta uza cosmetica pa aparenta cu a logra algo sin cu e ta trece fruto real pa e situacion.
Ehempelnan di falta di handhaving:
A menciona e ley di cacho (Ley di Cacho) y e uzo di parkeerlot pa persona cu discapacidad, unda cu na Aruba hopi biaha no ta tuma accion, mientras cu mesun ciudadanonan ora nan bay exterior (manera na Merca/Walmart) sí ta respeta e reglanan di biaha. Nos a crea un Aruba di personanan malcria y desordena?
Solucionnan tecnologico mofa:
A señala e ineficiencia den infrastructura y siguridad, cuestionando pa kico e Korps Politie no por uza tecnologia simpel manera sensornan pa monitoria e rutanan of tramitenan na Aruba, evitando cu ta reacciona solamente ora tin un protesta of ora cu cera un caminda. Nos instancianan y gobierno falta di vision ?
E mensahe directo pa e lidernan politico
E yamada ta pa e medionan di comunicacion y e pueblo mes drenta den accion y exigi contesta directo for di e Ministernan. Si tur hende paga nan belasting debidamente, e carga fiscal lo baha pa tur comerciante y lo crea un miho ambiente economico.
Nos kier traha ley nobo, Pero nos tin cu bin cu handhaving pa e leynan cu nos tin, leynan di aña 40 di existencia cu ainda no ta funciona manera mester ta paso no tin handhaving. Segun CUA no bin cu ningun ley nobo y pero bay haci handhaving di loke tin, y nos ta bay tin un miho Aruba.