Den e marco di e celebracion di e Siman di Prevencion di Candela y e Dia di Bombero, e presencia femenino den e cuerpo di bombero a tuma un papel protagonico. Analisa Maria, un di e poco bomberonan femenino na Aruba, a comparti su experiencia, e retonan y e orguyo di ta parti di un profesion cu historicamente tabata domina pa hende homber.
Kibrando eschemanan di Genero
Maria a enfatisa cu e decision pa drenta e cuerpo di Brandweer Aruba tabata motiva pa e deseo di demostra cu e capacidad y e dedicatoria no ta depende di genero. Su testimonio ta resalta cu e retonan fisico y operacional ta wordo enfrenta di e mesun manera pa tur integrante di e ekipo, sin distincion.
“Mi decision tabata pasobra mi kier mustra cu un muhe por tambe. Bo no mester tin miedo di bo condicion di muhe pa logra algo den bida. Maske na Aruba e profesion aki ta conoci pa ta di hende homber so, ami ta den e truck cu nan, mi ta paga candela cu nan, y mi ta yuda den accidentnan. Locual nan ta haci, ami tambe ta haci,” Maria a expresa cu orguyo.
Den su declaracion, Maria a destaca e apoyo constante cu e ta ricibi di su coleganan masculino den e departamento, locual a facilita su integracion y a fortalece e trabao den ekipo. Pa Maria, e echo di a traha duro pa yega unda e ta awe ta trece un satisfaccion personal profundo y un sentimento di logro profesional.
Contestando e pregunta di prensa pa e hobennan y mucha muhenan cu ta mira e profesion di bombero cu interes pero cu por sinti cierto duda of miedo, Maria a manda un mensahe directo y inspirador:
No tin miedo! Si bo kier purb’e y bo kier e, bay p’e. E trabou ta bunita, pero e ta un trabou serio. Bo ta topa cu momentonan cu no ta agradabel, pero p’esey bo ta entrena y bo ta prepara bo mes mentalmente y fisicamente.”
E testimonio di Maria no solamente ta resalta e avance den e inclusion di genero den e cuerponan di emergencia na Aruba, sino cu e ta sirbi tambe como un ehemplo di motivacion pa e futuro generacion di muhenan cu ta busca pa habri caminda den profesionnan no-tradicional.