Cuerpo Policial Aruba (KPA) a emiti un comunicado oficial tras e incidente fatal cu a tuma luga ayera na Pos Abou, unda un persona a perde su bida despues di un incidente di tiramento cu a involucra polis.
Altocomisario Ramon Arnhem a describi e sucedido como un incidente lamentabel y doloroso, cu a afecta tur parti involucra.
“Un situacion asina ta dificil y impactante pa tur esnan envolvi. Pa un mayor y famia perde un yiu di forma repentino ta inexplicabel y causa hopi dolor,” asina a declara Arnhem.
Segun e altocomisario, polisnan nunca ta sali for di cas cu e intencion pa termina den un situacion fatal. “Nos niun kier pa un intervencion termina di e forma aki. Mi coleganan ta biba e dolor mescos cu nos comunidad y varios di nan ta ainda den shock dor di loke a sosode,” el a añadi.
Arnhem a indica cu e incidente a causa un impacto profundo tanto riba e famia di e victima como riba e agente policialnan cu a wordo involucra. “Como altocomisario, e ta haci mi dolor cu nos ta enfrenta un situacion cu ta afecta profundamente nos comunidad,” el a bisa.
Riba e investigacion, Arnhem a enfatisá cu e caso ta actualmente bao investigacion independiente pa Landsrecherche, bao liderazgo di Ministerio Publico. “Mi ta compronde cu tin hopi pregunta y hopi persona kier claridad riba loke a pasa. Hustamente pa esaki, e investigacion ta den man di Landsrecherche, pa cu na final tur parti involucra por haya claridad,” el a declara.
Pa motibo cu e investigacion ta na curso, KPA a indica cu tur pregunta adicional mester wordo dirigi directamente na Ministerio Publico.
Altocomisario Arnhem a expresa su condolencia na famia di e fayecido y sa cu KPA tambe ta brindando sosten na e agente policialnan cu a wordo afecta pa e evento. “E no ta facil pa ningun di e parti. Nos ta lamenta profundamente loke a sosode y nos lo percura pa tur esnan involucra haya e sosten necesario,” el a bisa.
Finalmente, Arnhem a haci un yamada na comunidad pa mantene calma y trankilidad. “Mi ta pidi nos comunidad pa ban mantene e trankilidad y laga e investigacion cana su caminda,” segun e comunicado oficial di KPA.