Rápidamente Boneiru por pasa mas hende angua kontra corona. Esaki ta nesesario pasobra e kantidat di infekshon ta preokupante i mas hende ta bira gravemente malu. Ku e mas di 11.000 bakuna èkstra di Pfizer ku siman pasá a yega for di Hulanda, por kuminsá pasa habitantenan for di 18 aña angua. Ku esaki ta pone un paso importante pa protehá nos isla mas mihó kontra corona i redusí preshon riba kuido.
Na fin di aprel un biaha mas ta bini un kargamentu di 11.000 bakuna pa e di dos angua. E periodo entre e promé angua i e di dos angua ta bira sinku siman. Por pasa angua di djaluna te ku djasabra . Si tur hende hasi uso di e bakunanan èkstra, despues di dos angua 75% di e poblashon adulto di Boneiru ta kompletamente bakuná. Den e porsentahe aki a konta tambe personal di kuido, hendenan di 60 aña bai ariba i otronan ku ya kaba a bakuná.
Ora ku minimalmente 70% di poblashon adulto di Boneiru a haña e dos anguanan, nos ta spera ku esei ta duna mas espasio pa suavisá e medidanan di corona. Ekonomia por lanta para atrobe i nos poblashon por bai bèk na su bida di promé ku e krísis di corona.
Pa un mihó protekshon dos angua ku e bakuna di Pfizer ta nesesario. E chèns ku bo ta haña corona despues di dos angua ta hopi chikitu, pero no sero. Pa e motibu aki por lo pronto e mesun reglanan di corona ta konta pa hendenan ku a bakuná, ku pa hendenan ku no a bakuná ainda. Ta te ora 70% di nos poblashon a bakuná, hopi mas kos ta bira posibel.
1 comment