Awe mainta Hues di Corte di Husticia a dicta sentencia den e caso penal cu Ministerio Publico a cuminsa contra e homber B.(44), kende ta wordo acusa di a secuestra, viola y maltrata severo su señora V.
Por a compronde cu Hues no a haya proba e maltrato severo y door di esey Hues no a confirma e exigencia di Fiscal di 7 aña di prison. Hues a baha e castigo na 5 aña di prison.
FISCAL A EXIGI 7 AÑA DI PRISON
Dia 9 Januari 2026 tratamento di e caso a tuma lugar caminda Fiscal a bisa Hues cu e adiccion di B. a causa cu e drama a sosode 10 Augustus 2025. B. tabata blo kier tin relacion sexual y V. tabata nenga. Dia 10 Augustus 2025, B. a bay te na trabao di V., gar’e, lastr’e, hink’e den auto. Na e cas di B., V. a wordo viola y maltrata. Fiscal ta haya cu e maltrato ta severo y potret ta mustra esey bon cla. V. mester a keda 5 dia interna den hospital pa hemoragia celebral. B. a dal V. cu forza diferente biaha na cara. Fiscal ta haya cu B. a tacha e integridad di V. kende a keda afecta y awor ta wardando pa haya tratamento di psycologo. Nan yiunan tambe a keda afecta. Pa cu castigo, Fiscal a bisa cu e ta tene cuenta cu ta promer biaha B. ta cay den man di husticia. Fiscal a exigi 7 aña di prison, kitando e tempo cu B. ta sera. Fiscal a bisa cu e ta tene cuenta cu e peticion di V., pa B. haya tratamento. Fiscal ta kere cu ora yega e momento di libertad condicional, lo bay atende cu esaki. Pa loke ta e demanda di daño di 15 mil Florin, Fiscal ta haya cu ainda V. mester di tratamento. Fiscal ta pidi Hues pa aproba e demanda y pone medida di pago. Tambe Fiscal a exigi pa B. paga e demanda di 300 florin pa e cellular di V. cu B. a kibra.
SENTENCIA DI HUES
Hues a bisa cu e ta haya B. no ta culpabel di maltrato severo. Hues a bisa cu for di potret, relato medico por a compronde cu e maltrato no tabata asina grave. Hues a declara B. liber di e acusacion di maltrato severo.
Hues a rechaza e defensa di abogado, kende a bisa cu Hues mester declara B. liber di a viola su señora V. y secuestro. Hues ta haya legalmente proba cu B. a viola e señora V. Hues a bisa cu e ta haya e declaracion di V. y testigonan ta mustra cu tabatin violacion, secuestro y maltrato.
Hues a bisa cu e ta haya proba intento di maltrato severo.
Hues a rechaza e defensa di abogado cu B. a actua den defensa propio contra V. cu a atak’e. Hues ta haya cu ta B. a agredi e señora V. y e señora V. mester a defende su mes.
HUES A BAHA E CASTIGO
Hues a bisa cu esakinan ta hechonan serio. Hues a bisa cu pa cu e castigo, e ta tene cuenta cu ta promer biaha cu B. ta cay den man di husticia. Hues ta tene cuenta cu orientacion di castigonan cu Hof ta duna pa casonan asina.
Hues a bisa cu door cu e no a haya maltrato severo proba, e no ta sigui Fiscal su exigencia di 7 aña y ta baha e castigo.
Hues a condena B. na 5 aña di prison, kitando e tempo cu e ta sera den KIA. Hues tambe a ordena pa B. paga e 300 florin di a kibra e cellular y e demanda di daño material di 15 mil florin. En total B. mester paga e señora V., 15.300 florin. Hues a pone e medida di pago. Esey ta nifica cu B. lo mester paga via Ministerio Publico e suma di 15.300 florin y Ministerio Publico lo percura pa e señora V. haya e placa.