Un aña nobo a cuminsa cu un acontecimento lamentabel: un detenido a pone fin di su bida den cel di polis. E caso aki no ta unico. den pasado, varios detenido na Aruba a pone fin na nan bida mientras tabata bou custodia di autoridatnan, loke ta sigui genera preocupacion serio den comunidad.
E ripiticion di incidente asina ta laga pregunta legitimo riba e sistema di vigilancia y maneho di detenido. Ta surgi duda si Cuerpo Policial Aruba (KPA) ta implementando suficiente medida preventivo pa proteha bida humano, specialmente na momentonan cu un persona ta bou presion mental, culpabilidad of ansiedad extremo.
Detencion por causa un impacto psicologico profundo. E pregunta principal ta: con frecuencia ta haci control den celnan? Ta tin vigilancia continuo? Ta tin evaluacion psicologico riba sospechosonan vulnerabel? Te na e momentonan aki, no ta cla si a implementa cambio structural of protocol nobo pa evita tragedianan asina. Principalmente cu ta den un temporada di famia y fiesta di Pasco y aña nobo, tabatin extra vigilancia?
Segun informacion oficial di KPA, riba 1 di januari 2026 alrededor di 7:40 di mainta, durante un control rutinario den celnan di warda di polis Santa Cruz, un agente a topa cu un detenido masculino cu lo a pone fin na su bida. Inmediatamente a informa e chef van dienst, kende a pone Central di Polis na altura.
Central di Polis a activa e procedura necesario y a informa tur instancianan concerni. Dr. Forensico, polis tecnico y Landsrecherche a presenta pa conduci un investigacion completo. Departamento di Slachtofferhulp tambe a brinda apoyo na e famia durante e momento dificil aki.
E fayecido ta un homber di nacionalidad Colombiano, di 45 aña di edad.
Cuerpo Policial Aruba a expresa nan condolencia na famia di e difunto. Mientras e investigacion ta sigui su curso, ta spera cu e incidente aki lo sirbi como un yamando urgente un biaha mas pa evalua y fortalece e sistema di proteccion, vigilancia y atencion mental pa detenido, pa asina preveni cu tragedianan similar sigui ocurri den futuro.