Ayera un biaha mas nos Estado di Derecho a wordo sacudi cu e “toegangsontzegging” di un empleado publico di Parlamento. Un persona cu dia 5 di september 2021 a cumpli 30 aña di servicio trahando na Parlamento. Un persona cu SEMPER tabata cla pa yuda TUR miembro di Parlamento y politiconan ora tabata tin mester di documentonan. Sra. Khemlani tabata e persona indica pa logra haya e documentonan ya cu su persona tabata encarga di registracion di tur documento pa archivo di Parlamento. Documentonan cu pa colmo TUR ta publico. Mi experencia cu e persona aki semper tabata uno profesional. Den su forma pa atende cu sea miembronan di Parlamento y politiconan tabata resalta su “INTEGRIDAD” y su “AMOR PATRIO”, ingredientenan cu e gobierno actual ta carece totalmente di dje y ta sanciona esnan cu si ta cumpli cu nan debernan civico debidamente.
Di experencia mi sa tambe cu e tabata yuda nos TUR ora di traha p.e. comunicado, mocionnan, preguntanan etc.etc. Nos no mester lubida cu antes NO tabata tin “fraktiemedewerkers” y e tabata yuda e.o. mi persona, sr. Eddy Briesen, sr. Fredis Refunjol, sr. Nelson Oduber y alabes varios parlamentarionan di fraccion di AVP, OLA, PPA, ADN tambe, pasobra su interes no tabata partidista sino interes general di Aruba. Si awor a corre cu e señora aki, kier bay cu su computer pa bay wak si en berdad ela duna informacionnan PUBLICO e.o. na mi persona, por fabor bay wak for di e dia cu ela drenta den servicio di gobierno den Parlamento na 1991. Siman pasa pueblo ta testigo di un eliminacion di un otro empleado publico drechi y integro na DIMAS y awor ta turno na Parlamento, cua otro ta sigui? Mi no por imagina mi mes cu ainda por tin hende cu kier bin pretende cu e atraco aki contra nos Estado di Derecho ta INTEGRO!
Nos por a tende e RAIZ ta grita: “NOS NO TA NAN”! Definitivamente boso NO ta NAN! Boso ta PIO cu NAN, marionetanan cu NO tin curashi pa cumpli cu e deber di defende democracia y pueblo.
E “toegangontzegging” di sra. Khemlani lo NO nifica cu mi lo no haya informacion pa scirbi nos articulonan critico. UPP lo sigui ta e “WATCHDOG” pafo di Parlamento y cu e PERSECUSION POLITICO aki contra ambtenaarnan cu semper a cumpli cu nan trabao, ta mas brabo nos lo bira. Nos no por permiti cu un gobierno ta kere cu nan lo por hasi y deshasi djis pasó nan ta wordo sostení dor di 11 marionetanan cu ta simpelmente papia “her master’s voice”! Asina poco poco nos democracia lo bay keda na filingrana y lo no dura mucho cu nos lo yega na nivel di Rusia y Venezuela na unda voz di e oposicion ta wordo silencia. No ta pornada ya caba cierto medionan di comunicacion a ricibi carta di menasa y/o ta wordo boycotea. Y awor ta purba di intimida empleadonan publico cu tipo di actonan peligroso manera ta e 2 ultimo casonan di PERSECUSION POLITICO! Nos no mester lubida cu ora cu un gobierno hinca MIEDO y ora cu MISHI cu e libertad di prensa, bo ta mishi cu un di fundamentonan di bo democracia y esaki nos como pueblo bow ningun circumstancia por permiti.
Ora cu señora Khemlani tabata haci TUR e trabao pa fraccion di MEP, y su SO pa nan, e ora SI e tabata bon. Un trabou cu sra. Khemlani a hasi bou di Nelson Oduber, Edwin Jacobs, Ady Thijssen, mi persona y Evelien Croes como Lider di Fraccion. Awor diripente ela bira “persona non grata” y nan kier corre tilda e señora di “mogelijk verrichten van politieke handelingen” pa OTRO fraccionnan cu tin representacion den Parlamento. Awor e trabao cu e ta bin ta haci e.o. pa Fraccion di MEP, pa asina tanto tempo, diripente a bira un sumpiña pa e gobierno di mas deshonesto y intransparente cu tin desde 1986 pa awor.
ARUBA, UNDA NOS TA BAY???