Con por ta posibel cu e supuesto experto den mundo di utilidad, esta Clifford Heyliger no ta consciente ainda con bao gobernacion di su partido AVP e companianan estatal WEB y Elmar a hinca miyones y miyones di florin den e locuranan di conferencianan green, pago miyonario pa discurso di Al Gore, boto miyonario di Wubbo Ockels, Richard Branson, luznan LED y tambe a yena e empresanan estatal cu activistanan di AVP, anto riba dje a suta pueblo cu aumento di prijs di coriente? Tur esaki tabata forma parti di e famoso plan di energia “Green 2020” di AVP cu Clifford ta papia di dje? No mester lubida tambe e debacle di 300 miyon florin di hedging debi na e locura di su colega experto riba kruk Mike de Meza kende cu su bola di cristal a pronostica cu e pijs pa bari di petroleo lo yega te 500 dollar y ni algun luna despues e prijs pa bari a baha drasticamente y a yega na apenas 30 dollar pa bari, mientras e sabionan di AVP a core hedge na 92 dollar?
Pakico a aumenta e pijs di coriente na 2014?
Con por ta posibel cu Elmar a gana netto na 2011 mas cu 11 miyon florin y na 2012 un suma di 12.9 miyon florin, pues den 2 aña casi 24 miyon florin, y asina mes a aumenta e prijs di coriente cu 15% na 2014? Unda tur e placa aki a bay? Y WEB a gana 16 miyon florin durante 2012-2013. Pues den total, WEB y Elmar a haci ganashi di 40 miyon florin! Anto pakico e tempo ey mester a aumenta e prijs di coriente?
No lubida tambe e 10 molinanan di biento, e 4 plantanan di Wärtsila, e planta di awa Seawater Reverse Osmosis di 8000 ton, tur e inversionnan aki durante Gabinete Oduber a reduci e consumo di fuel oil di 6000 bari pa dia cu 2500 bari, cu ta 40% menos na fuel oil – equivalente na 160 miyon florin – y cu logicamente a baha e gastonan di produccion di awa y coriente drasticamente. Resumiendo, si bo conta e 40 miyon florin di ganashi di WEB y Elmar y e 160 miyon florin menos na fuel oil, ta un espacio di 200 miyon florin a ser crea pa e gobierno di AVP por a probecha y derocha na nan antoho. Y tur esaki bao di nanishi di e ‘experto’den WEB, Clifford Heyliger!
Mas pregunta pa Clifford Heyliger
Ta increibel cu Clifford Heyliger den e periodo di aumento di prijs di coriente no ta consciente con WEB a masacra na 2012-2013 un suma di 7 miyon florin na Consultancy fees, 800 mil florin na Public Relations, na 2012 a cera un contract di 3 aña cu Kuzeta Aruba N.V. pa 7.2 miyon florin. Tambe a lease 44 auto desde 1 di juni 2010 pa 4 aña pa un suma di 2.2 miyon florin. A paga pa “Transportation” un suma di 1.8 miyon florin. Mescos Clifford mester publica tur e gastonan di e fiestanan na companianan di amigonan di AVP. Cuanto nan tambe a cobra na Elmar N.V.? Cuanto “friends, family and lovers” a pak eyden? Tur e bagamunderianan aki cometi pa su partido AVP, Clifford Heyliger no tabata na altura di dje? Of ta desde cu el a subi lista di AVP, tur su dos wowonan a cuminsa habri?
Finalmente, lo ta bon pa Clifford splica pueblo mas di e asunto corupto di hedging di su amigo y colega Mike 500 dollar y tambe elabora riba e contract cu a cera cu ECO Gas. Cuanto miyones di florin WEB a paga pa e infrastructura di e proyecto ey y cual proyecto despues a resulta den un fracaso total? Esakinan ta e famoso Bon Comun cu e partidarionan di AVP kier bin cune atrobe pa pueblo?
