Den cuadro di e maneho cu minister di Salud Publico sr. Dangui Oduber lo hiba e siguiente 4 añanan, e mandatario a reuni tambe cu Inspectie Volkgezondheid Aruba. Den e combersacion aki e mandatario a duna un splicacion amplio riba locual ta e maneho y vision pa cu Salud Publico pa 2021-2025.
Minister a pone enfasis riba e mehoracion riba e calidad di cuido, den esaki IVA ta hunga un rol instrumental pa e calidad di cuido cu nos tur kier mira na Aruba. Den esaki IVA tin e hermentnan necesario conforme diferente ley pa percura pa tin un nivel di cuido halto manera minister Oduber ta desea na Aruba. Den esaki minister Oduber a splica tambe cu e kier mira mas control y supervision riba e calidad di cuido y riba e kehonan cu ta wordo haci.
Minister Oduber a splica IVA cu su deseo ta pa tin mas personal pa apoya y yuda e departamento aki den tur e trabounan cu lo mester wordo haci. Pa asina por garantisa y percura pa tin un calidad di cuido halto, naturalmente mester di personal y esaki ta un di e reto nan cu IVA tin. Minister a duna di conoce cu IVA tin un scarsedad di personal pa tur e trabounan di inspeccion cu tin, y mester wordo haci. IVA tin un tarea hopi importante no solamente riba inspeccionnan pa calidad di cuido pero tambe e calidad di remedinan cu ta subi mercado na Aruba
Minister Oduber a sigui bisa cu IVA tin un rol importante tambe den ful e proceso di cannabis medicinal cu ministerio di salud publico lo keda encarga cune. IVA ta forma parti di e comision cu lo dicidi cua compania ta bin na remarke pa haya e permiso pa bin cultiva cannabis cu e producto final medicinal, Minister lo bay otorga permisonan a base di e consehonan cu e ricibi di e comision cu lo haci e evaluacion di tur esnan cu a participa den e proceso.
Tambe e mandatario a palabra cu lo bay tin consulta regular entre Ministerio di Salud Publico, IVA y DVG pa asina tur Partido ta riba e mesun liña di pensamento na tur momento. Pa asina percura pa e vision y maneho di Minister Oduber wordo ehecuta pa asina por garantisa un nivel di cuido halto na Aruba.
Finalmente Minister Oduber a menciona cu e reunion tabata uno hopi bon caminda hopi informacion a keda intercambia, a haci varios palabracion concreto. Minister Dangui Oduber ta mira un cooperacion entre ministerio y IVA hopi estrecho pa e siguiente 4 añanan di gobernacion