E siman aki a tene e “Justitieel Vierpartijenoverleg”, caminda Aruba a ricibi delegacionnan di Curaçao, Sint Maarten y Hulanda, pa asina crea lasonan mas fuerte entre e ministerionan di husticia, pa asina fortifica siguridad na nos frontera. Diamars a tuma luga e reunionnan na nivel oficial, y diaranson mainta a inicia cu e reunionan riba nivel ministerial. Durante e reunion aki, Minister di Husticia y Asuntonan Social Sr. Rocco Tjon a sinta cu Minister di Husticia y Siguridad di Hulanda Sra. Dilan Yeşilgöz-Zegerius, Minister di Husticia di Sint Maarten Sra. Anna E. Richardson y Minister di Husticia di Curaçao Sr. Shalten Hato. A toca diferente topiconan interesante pa loke ta e parti di siguridad y husticia, como tambe e capacidad pa maneha esaki.
Actualmente, tin diferente proyectonan cu ta andando pa loke ta husticia, cual ta conta cu un inversion grandi di parti di Hulanda. Pa e motibo aki, e ta hopi importante tambe pa nos tin suficiente capacidad pa por ehecuta e proyectonan aki. Banda di esaki, a trata tambe e buki nobo di strafvordering, y a evalua e contribucion di Kustwacht y Marechaussee. Manera ta conoci, e ultimo lunanan tin diferente intercepcionnan cu a tuma luga, tur e cifranan di esaki a wordo presenta, y asina por conclui cu e strategia cu ta ehecutando den reino por mira su fruto. Pues, diferente puntonan a bin padilanti durante e reunion aki, como tambe puntonan di mehoracion pa cu e plan di maneho pa aña 2023.
Crimen organisa ta un topico cu mayoria biaha ta bin padilanti, cual ta un prioridad pa loke ta RST, pero e ta un prioridad tambe di Ministerio di Husticia y Asuntonan Social, segun nos plan di maneho. E parti di crimen organisa ta wordo parti den diferente aspecto, manera e parti di informacion y inteligencia ta hopi importante pa cual motibo lo inverti hopi den e area aki hunto cu e parti di siguridad na nos frontera. Ta trata pues di un punto cu semper lo keda bin padilanti, mirando cu e ta un punto cu tin prioridad di Hulanda pero tambe di e paisnan Caribense.
Un hopi bon reunion entre e cuater paisnan den reino, caminda por bay spera hopi mas cooperacion cu resultadonan positivo pa e cadena hudicial.
