diputado Timoteo Silberie a lanza oficialmente e Trahadó di Presupuesto (Budgetplanner). Trahadó di Presupuesto ta un material di les cu diferente organisacion social na Bonaire lo bai traha cun’e. E ta yuda habitantenan pa haya mas conocemento di nan asuntonan financiero y maneha nan entrada y gastonan miho.
Durante e lanzamento oficial di e Trahadó di Presupuesto, diputado Silberie a enfatisa e importancia di consenchi financiero y prevencion: “Independencia financiero ta cuminsa cu conocemento. Door di duna e habitantenan e instrumentonan corecto, nos por sigui construi hunto cu nos socionan na un Bonaire caminda menos hende ta haya nan mes den un situacion di debe problematico y caminda mas habitante tin control riba nan futuro financiero.”
Den cuadro di e approach di problemanan financiero, Directorado Comunidad y Cuido di Entidat Públiko Bonaire a organisa un programa di ‘train-the-trainer’ (entrena e entrenador) na october 2025. Esaki a tuma lugar hunto cu Nationaal Instituut voor Budgetvoorlichting (Nibud). Na e entrenamento aki a participa representantenan di shete organisacion social.
Nibud ta un instituto di conocemento y informacion independiente riba tereno di finansa domestico y ta haci esfuerso pa logra un Hulanda sin problema financiero. Durante e entrenamento aki a pone e fundeshi pa desaroya e Trahadó di Presupuesto. E material di les practico aki ta sostene profesionalnan cu ta guia habitantenan ora tin problemanan financiero.
Desaroyo di e Trahadó di Presuesto ta conecta cu e Plan di programa “Traha pa logra Prosperidad y Bienestar di Bonaire” (“Werken naar Welvaart en Welzijn van Bonaire”). A base di e programa aki a forma diferente ekipo di trabou, entre otro e ekipo di trabou Debe.
E ekipo aki ta consisti di representantenan di Entidat Públiko Bonaire, seccion Trabou Social Financiero di Sentro Akseso, ministerio di Asuntonan Social y Empleo (SZW) y NVVK (e organisacion di sector pa ayudo di debe y asistencia financiero). Den e ekipo di trabou ta trahando pa sigui desaroya mas e trayecto legislativo, ayudo cu saniamento di debe, sosten preventivo y maneho di presupuesto. Ademas ta haci esfuerso pa logra un cooperacion fuerte entre e socionan di cadena.
Den e cuadro ey, recientemente a organisa entre otro un sesion di trabou na Hulanda. Durante e encuentro aki, e socionan a sera conocesí cu e socionan envolvi di Hulanda Europeo. Tambe a discuti facilidadnan di cooperacion cu diferente municipio na Hulanda manera Tilburg, Utrecht y Amsterdam.
Entidat Públiko Bonaire, den colaboracion cu Sentro Akseso y otro socionan, ta keda haci esfuerso pa sigui desaroya ayudo pa saniamento di debe preventivo y curativo. Pa medio di estrategia-, actividad- y acuerdonan di cooperacion nobo, ta trahando pa fortifica independencia financiero y bienestar di e habitantenan di Bonaire.
