Frakshon MAN-PIN a pidi pa e reunion ku Minister di Finansa tokante e Landsverordening op de Kansspelen (LOK) wordu posponé. E ùltimo desaroyonan ta hopi serio ku ta deskreditá nomber di nos pais. CGA(Curaçao Gaming Authority) a konfirmá un akseso no outorisá na su online gaming portal ku ta keda maneha na Malta, ku a dura varios luna, i mientras ku un investigashon forensiko ta den proseso.
Ademas, Minister Cooper a indiká ku tin investigashonnan lokal i internashonal riba e situashon i di loke ta pasando den e sektor i kontratonan ku a ser otorga.
Pa Frakshon MAN-PIN, no ta responsabel pa drenta den un debate kaminda e investigashonnan ainda no ta kla i posiblemente no por duna tur e klaridat e riba preguntanan ku tin.
Promé investigá, haña sa e bèrdat i despues debatí
Nos a alertá ya na 2024 riba e risíko di pone kòntròl riba nos data, plataforma i hurisdikshon den man di eksternonan sin “checks and balances” sufisiente. Awe, e data ku a lèk ta mustra ku e pregunta nan aki no tabata hipotétiko, sino un realidat.
Nos Frakshon MAN-PIN ta kere ku Gobièrnu mester asumí su responsabilidat i ku, despues di e investigashonnan, Mester pone kla pa pueblo kiko a pasa i ki akshon ta bai ser tuma. Banda di investigashon nos ta konvensí ku mester bini kambio den e lei di LOK, kaminda tin mas kòntròl lokal i “checks and balances” real.
Nos lo sigui insistí pa e infratruktura i data di nos hurisdikshon bin bèk na Kòrsou serka nos Core i BlueNAP, i pa Parlamento i pueblo por ta garantisá ku nos sistema di online gaming ta sirbí e interes di Kòrsou.