Un tema crucial manera LNT ta exigi seriedad, transparencia y control parlamentario riguroso. Esaki ta e posicion cu Minister Geoffrey Wever a publica recientemente, y ta dificil pa no ta di acuerdo cu cada palabra.
Sin embargo, e principio aki ta lanta e pregunta inevitabel: e normanan aki ta conta pa tur decision di gobierno, of ta uza nan solamente ora e ta sali na fabor di nan interes politico?
Dicon a duna un excepcion di LNT pa Aruba Airport Authority (AAA) sin debate den Parlamento, pero awor si ta pidi reaccion pa cambia e ley? Y dicon e mesun seriedad ey no a wordo aplica na HOFA?
E excepcion sin control previo pa Aruba Airport Authority
Na november 2025, Gobierno a opta pa otorga un excepcion notabel pa Aruba Airport Authority (AAA). Mediante un Landsbesluit, a autorisa un sueldo anual di Afl. 1.089.396 pa un CEO proponi pa Schiphol International BV, un suma cu ta casi tres biaha e maximo di Afl. 369.000 stipula bou di LNT.
Ningun hende ta cuestiona cu un director competente merece un bon salari, ni tampoco cu cooperacion internacional ta di gran balor pa e maneho di nos aeropuerto. Sin embargo, un decision di e magnitud aki, cu ta trata di fondonan publico y interes general, tabata exigi un deliberacion prome na mesa di Parlamento, y no despues di e echo.
Dicon Gobierno a opta pa no pidi e opinion of e sentimento di Parlamento prome cu a otorga e excepcion aki?
E peliger di altera LNT sin un base solido
Awor, despues cu Gobierno a habri porta pa excepcion, nan a bin pidi e sentimento di Parlamento riba cuater modificacion den e LNT. E cambionan aki no ta simplemente tecnico; nan tin e potencial pa exclui entidadnan estatal for di e ley y substitui e maximo actual pa un sistema nobo cu ainda no ta existi.
E propio conseho huridico di Gobierno ta confirma cu LNT a nace den circunstancianan extraordinario y bou di un presion pisa di Hulanda, den e periodo cu nos pais tabata depende di sosten financiero (liquiditeitssteun). E mesun conseho ta admiti cu tin retonan serio, cu e casonan di corte contra Pais Aruba no ta marchando faborabel, y cu LNT ta mas cu cla pa un evaluacion y revision profundo. Pero e conseho ta bay un stap mas leu: e ta conseha pa instala un comision di expertonan pa evalua e efectividad y e consecuencia practico di e LNT. Alabes, e ta subraya cu cualkier maximo nobo di salario mester wordo funda riba un estudio comparativo serio cu e entidadnan den nos region.
E pregunta central ta: si Gobierno su propio expertonan ta recomenda un evaluacion independiente prome, dicon Gobierno kier cambia e sistema prome cu e trabou ey keda cla?
No por kita e ley awo y bisa cu e reglanan di corporate governance lo bin despues. Den e vacuum ey, ta ken ta determina e salarionan? Ken ta controla? Y con e ciudadano por verifica con su placa ta wordo gasta?
E dobel standard: Un regla pa LNT, y un otro pa HOFA
Aki ta caminda e dobel standard di Gobierno ta keda bisto. Di un banda, Minister ta papia bunita di seriedad, transparencia y control parlamentario pa LNT. Di otro banda, den e negociacionnan di HOFA, un Ley di Reino cu por afecta nos autonomia, nos presupuesto y e futuro financiero di nos pais, e palabracionnan di IPKO pa involucra Parlamento prome, durante y despues a keda completamente ignora.
Gobierno no por aplica reglanan di transparencia di forma selectivo. Bo no por hunga cu dos cara: pidiendo procedura corecto pa LNT, pero scondiendo informacion pa HOFA.
Te awe, Parlamento no a haya e espacio serio pa analisa y determina nos posicion prome cu Gobierno a sigui cu e proceso di Hofa.
Transparencia no ta un slogan; e ta un obligacion. Control parlamentario no ta un fabor cu Gobierno ta duna; e ta e esencia di nos democracia. Ta parce cu Minister Geoffrey Wever ta tarda pa compronde e parti aki.