KRALENDIJK, Bonaire
Governance & Integrity International (G&I) a finalisá e análisis di e dokumento di traspaso di Bonaire Holding Maatschappij (BHM). Gezaghèber Edison Rijna ku a duna e enkargo pa hasi e análisis a risibí e relato inkluso e konseho kon sigui anda awor.
E büró di integridat G&I durante e análisis a hasi un distinshon entre interpretashon personal (opinion), pensamentu ku un motivashon polítiko, mehorashon real i sospecho di no ta kumpli ku reglanan di bon gobernashon.
Den dos kaso ku e eks direktornan di BHM a trese dilanti komo punto di atenshon, G&I ta haña ku lo ta bon pa hasi mas investigashon di echo promé ku por saka un konklushon. G&I a konsehá gezaghèber Rijna pa laga Bureau Integriteit Nederlandse Gemeenten (BING) hasi e investigashon. Gezaghèber Rijna ta sigui e konseho aki. Asina ku e tarea ta ofisialisá i ta konosí kuantu tempu e investigashon ta tuma lugá lo komuniká esaki.
Gezaghèber Rijna a pone Kolegio Ehekutivo, Konseho Insular i Sekretario di Estado di Asuntunan Interno i Relashon den Reino i e Tim di Maneho Deelnemingen na altura di su desishon.