ORANJESTAD,Aruba
Cu hopi placer Aruba Karate Bond, bou presidencia di ‘sensei’ Felix Tromp, ta invita tur karateka miembro y no miembro di Aruba Karate Bond pa participa na e campeonato ‘Aruba ABC Open Karate Championship 2020’ cual ta tuma luga na EPB Hato riba diasabra 8 di februari benidero cuminsando for di 11or di mainta. E campeonato aki ta pa tur atleta di 4 aña di edad bay ariba. Como invitado ta participa nos islanan ruman Boneiro y Corsow.
Aruba Karate Bond ta invita comunidad di Aruba henter pa pasa y apoya nos atletanan. Entrada ta gratis. Lo bay tin e arbitro local y internacional cu hunto lo percura pa un bon marcha di cada categoria di competencia. Tambe lo haya e bishita di ‘sensei’ William (Junior) Millerson, kende semper a apoya karate di Aruba. Interesadonan pa participa na e ‘Aruba ABC Open Karate Championship 2020’ por email na karatebondaruba@gmail.com
E campeonato aki ta wordo realisa cu ayudo di varios persona y compania na kende ta extende un palabra di danki: Minister di Turismo, Salubridad Publico y Deporte, esta señor Dangui Oduber, Stichting Sportsubsidie Aruba, Aruba Sport Unie, Fundacion Lotto pa Deporte, Comite Olimpico Aruba, Al Performance Training, Setar NV, SportCaribe y Lucky Super Store.