Featured Politica

Awor mas cu nunca friends & family ta florece


Diahuebs 25 di augustus e tres lidernan di oposicion den Parlamento di Aruba a firma un carta pa Minister President di Hulanda Mark Rutte y pa Secretario di Estado Alexandra van Huffelen den cual nan ta expresa nan preocupacion riba e situacion actual na Aruba. E lidernan di AVP, Accion 21 y MAS Mike Eman, Miguel Mansur y Marisol Lopez Tromp respectivamente ta preocupa cu e desaroyonan negativo politico den nos comunidad y ta distancia nan mes di e maneho destructivo di Gabinete Wever Croes II.

Lider di fraccion di MAS Marisol Lopez Tromp ta splica cu despues cu a entrega e carta aki, e reunion cu conseho di minister di reino a tuma lugar despues di cual secretario di estado Alexandra van Huffelen a expresa cu ainda e proposicion di CAFT pa un aanwijzing ta riba mesa. Apesar cu prome minister ta nenga esaki, realidad ta cu e proposicion aki ainda ta vigente y ta exigi cu gobierno mester drecha e presupuesto di Aruba cual a wordo aproba caba den parlamento pa un mayoria cu ta sostene gobierno.

Fraccion di MAS a vota contra, ya cu e presupuesto aki ta uno cu no ta realistico y no ta cuadra cu e palabracionnan cu a wordo haci entre Aruba y Hulanda for di dos aña pasa caba. Naturamente cu ta a base di e incumplimento aki, Aruba ta unda e ta awe cu e gobierno actual y cu un pueblo ta cansa y harta di e situacion aki. Lopez Tromp a sigui bisa cu tur hende sa cu gobierno di Aruba a pidi placa y cu esaki a wordo nenga ya cu Hulanda ta bisa cu e presupuesto mester wordo adapta y cu mester wak e palabracionna haci den dje, entre otro e reformanan cu a wordo palabra. Tambe mester sanea e situacion financiero di pais Aruba.

Loke por mira ta cu gobierno a hustamente aumenta e gastonan y e motibonan faborito cu prome minister ta menciona, ta cu tur e situacion ta a causa di e pandemia y e guera di Ukraina. Pero e realidad ta cu gobierno tin añanan caba pa cumpli cu e rapport aki y na e momentonan aki nos ta 4 aña despues y ainda CAFT mester bisa gobierno cu ainda nan no a cumpli cu loke a palabra.

Mester kita e nepotismo cu tin te dia di awe cu ta faborece famianan y amistadnan serca di gobierno y aunke cu gobierno a pasa un ley di screening, loke en efecto a wordo haci ta, aparte cu e ley di screening ta bon pa ministernan, e gobierno aki a percura pa haci cu e ‘friends and family’ mas aun por wordo ubica serca di e minister den trabou. Enbes di a haci e criterianan mas pisa pa evita cu tin nepotismo, e gobierno aki a percura pa haci esaki mas suave. Esaki ta demostra e intencionnan robes cu e gobierno aki tin pa continua cu nepotismo.

Related posts

Stichting BOB Aruba a inaugura nan oficina nobo y ta invita e damanan, entre 45 cu 75 aña pa traha nan cita y bin bishita na e oficina nobo

EA News Author

Casonan di COVID-19 di e islanan den Caribe 28-01-2021

EA News Author

Reunion cu Prome Minister riba contenido cu ya caba a acepta di Hulanda

EA News Author

Leave a Comment