Featured Local

Planta di purificacion na Bubali: Keto bai un ticking time bomb


No ta un secreto cu e planta di purificacion (RWZI) na Bubali mester wordo renoba y mester un upgrade. E planta aki ta existi pa basta decada caba y su situacion ta uno critico cu varios bes atencion a wordo poni na esaki cu e mester wordo drecha. Esaki lo costa alrededor di 16 miyon florin y ta algo hopi necesario mirando e echo cu e planta aki a surpasa su capacidad hopi tempo caba. Esaki ta ensera cu un rato of otro e planta por kibra y e awa sushi aki por cubri henter e area.

Parlamentario Marisol Lopez Tromp fi fraccion di MAS ta splica cu e problema no ta solamente esaki. Discushonnan cu tabatin tambe ta riba e consecuencianan y risico cu e area unda e planta ta situa ta core: e zona hotelero. Si algo mester pasa cu e planta aki y parti di dje haya daño of kibra e pregunta ta: kiko esaki lo nifica pa nos turismo, nos salud y full e infrastructura den e vecindad?

Pa e motibo aki mes prioridad a wordo poni y ta importante pa e pueblo sa cu mas o menos un aña pasa a tuma luga un reunion publico den Parlamento unda cu e fraccion di MAS a exigi claridad riba e CARMABI rapport. E rapport aki ta duna un bista riba e parti di e situacion cu e area ta den y daño cu tin cometi na cierto beachnan, na e lama bou awa y tambe e efecto di e awa di desperdicio cu ta sali di e planta aki y cu ainda diariamente ta drenta lama. Ki efecto esaki tin riba e aspecto di bacteria, riba e piscanan y e efectonan cu e awa por tin riba hendenan local y tambe turistanan cu ta landa den e area.

Henter e discusion aki a conduci na un reunion publico caminda a resalta cu Minister President Wever Croes a tene e rapport aki scondi. Ni cuanto Parlamento a pidi e prome minister pa e rapport di CARMABI, e no a haci e rapport aki publico. Ta e instituto di investigacion CARMABI na Curaçao mes a dicidi di haci e rapport publico y a publica esaki transparentemente riba su facebook. Y asina Parlamento di Aruba a haya e rapport aki pa lesa. Unabes cu a haya e documento oficial aki, Parlamento a yama un reunion publico pa haya claridad riba e resultadonan di e investigacion cu a wordo haci na Aruba.

Lider di fraccion di MAS parlamentario Marisol Lopez Tromp kier sa con leu ta cu e ehecucion y preparacion pa loke ta e renobacion y upgrading di e planta di RWZI y kiko a para di e 16 miyon cu a wordo ubica pa esaki, den cuanto fase e renobacion lo tuma lugar y pa ki tempo ta premira cu e trabounan lo cuminsa.

Related posts

Miss beauty Aruba

EA News Author

Proyecto educativo “BeYourOwnBoss” di Qredits Aruba y Aruba Bank N.V. a “Kick-Off”

EA News Author

Gobierno di Aruba a dicidi di lanta un fondo di asistencia social

EA News Author

Leave a Comment