Disertashon konsehal daisy coffie na okashon di dia di boneiru 2021

Awe riba e fecha importante aki; 6 di sèptèmber, aparte ku nos ta habri un siman riba djaluna selebrando Dia di Boneiru, nos ta konmemorá ku 70 aña pasá nos a risibí e bos di pueblo ofisialmente ku e ‘eilandenregeling’, kaminda e pueblo Boneriano su derechonan a keda ankrá por medio di un Konseho Insular. 

Boneiru, e selebrashon di nos dia mester sirbi komo un refleho pa traha riba nos responsabilidat pa logra mihó desaroyo di e hende, teniendo kuenta kui nos hendenan, nos kultura, nos kustumbernan i respetando e Boneriano.

Kiko nos a logra? 

Unda nos ke bai? 

I ki ròl kada un di nos ke tin riba nos dushi tera? 

Ròl di e Boneriano, mester ta pa pone prioridat i énfasis, riba loke nos ke pa un mihó futuro. Tempu di krísis mundial manera aworakí, a saka nos forsa i motibu dikon nos mester kombibí mihó ku otro, ta solidario pa otro i traha mihó riba e union pa saka nos lugá pa dilanti. Shen porshento ‘100%’ amor pa nos patria. 

Paso e Boneriano, ta tur siudadano, ku ta biba, kontribuí i ku ta respetá nos kultura, norma-, balor- i prinsipionan, nos himno, bandera i eskudo, ku ta protehá nos idioma Papiamentu i salbaguardiá e interes di e pais aki for di punt’é Wecua te ku Willemstoren.

 Un mihó futuro ku ta basá riba un Boneiru desaroyá riba formashon kaminda norma, balor i prinsipio ta fundamental pa kresementu di nos sosiedat. 

Paso nos lo no ke mira bek i puntra kiko a keda di e Boneiru ku nos a laga bai sin hasi nada pa karga nos responsabilidat i sin nos tuma direkshon pa desaroy’é. 

Nos kompromiso ta, pa riba e tera di solo i suave bientu di hendenan humilde i desente, inová den balansa kaminda por pone kosnan konkreto sosodé pa un i tur.

Kaminda un bes mas nos por wapa pronto nos simadan, gosa di i kuida nos identidat. Kabes ariba, pa huntu nos sali pa dilanti; guiá pa e lus di faro ku mester hiba nos den e direkshon ku ta sigui brinda diferensia na nos isla. 

Fo’i profundidat di e apelashon inspirativo di Frakshon Coffie, nos ta pidi lus pa kada kas, salú pa kada hende, pas den kada kurason i amor pa nos Boneiru ariba tur kos! Biba nos Boneiru, pa tur dia i añanan te den eternidat.  

Felis Dia di Boneiru.