“Akademia Popular Errol Scoop”/APES, e ala di formashon emansipatorio di “Movementu Kousa Promé”, dia 30 di ougùstùs 2021, a ránka sali ku su di 15 siklo di formashon emansipatorio titulá: “Patriotismo, un wes’i lomba pa e yu di Kòrsou Nobo”.
Apertura di e siklo a resultá un éksito rotundo.
82 yu di Kòrsou motivá a inskribí pa partisipá na e siklo. Pa motibu di covid nos no por a tuma mas hende. Un grupo grandi a keda desapuntá. Nos ta lamentá esaki.
E promé dosente, mr.dr. René Rosalia, ku un vibrashon positivo, edukativo i patrióko, a duna un kolegio interesante i al kaso. Hopi informashon emansipatorio balioso i krítiko a bin dilanti. Rosalia a splika e konseptonan patria, patrimonio i patriotismo. Patriotismo ta amor pa patria. Un sentido fuerte di ta pertenesé komo patriota na bo pais natal, bo patria. Presensia di patriotismo komo un balor importante serka siudadanonan di un pais ta sumamente importante pa e pensamentu, komportashon i posishonamentu di e yu di Kòrsou pa ku ekonomia, bario, turismo, enseñansa, idioma, bibienda, pobresa i polítika en general di su patria. Komo ku un hende no ta nanse patriota Kousa Promé mediante Akademia Popular Errol Scoop ta tene e siklo aki pa yuda fomentá patriotismo i fortifiká e wesu di lomba di e yu di Kòrsou.
E siklo ta konsistí di:
- 11 lès teorétiko
- 2 lès móbil
- 1 lès práktiko
E siklo tin komo meta, pa yega na:
- Un yu di Kòrsou nobo; patriótiko ku orguyo i balor propio i ku un inmenso amor pa Kòrsou. Un yu di Kòrsou ku ta dispuesto pa hasi sakrifisio na fabor di su patria i ku ta kere ku huntu nos por hiba Kòrsou dilanti.
E lèsnan ta tuma lugá riba djaluna di 18.30 pa 21.00’or na Sentro di Bario Sta. Maria.
Lástimamente, sekretariado di APES tin ku partisipá ku no ta posibel mas pa inskribí ya ku no tin mas lugá.
1 comment
[…] Source link […]